হাত ভঙাৰ বাবে টেষ্ট ছিৰিজৰ পৰা বাহিৰ মহম্মদ ছামি; ভাৰতীয় শিৱিৰত মোক্ষম আঘাত

অষ্ট্ৰেলিয়াৰ বিৰুদ্ধে চলিত প্ৰথমখন টেষ্টত শোচনীয় পৰাজয়ৰ পাছতে ভাৰতীয় শিৱিৰত আৰু এক মোক্ষম আঘাত লাগিল। হাত ভঙাৰ ফলত বাকী টেষ্ট ছিৰিজৰ পৰা বাহিৰ হ’বলগীয়া হ’ল টীম ইণ্ডিয়াৰ আক্ৰমণাত্মক পেচাৰ মহম্মদ ছামি।

বাতৰি অনুসৰি, দ্বিতীয় ইনিংছত বেট ধৰাৰ সময়ত পেট কামিন্সৰ বাউন্সাৰ বল এটা ছামিৰ হাতত লাগে। বাওঁহাতত আৰ্মগাৰ্ড আছিল যদিও সোঁহাত সুৰক্ষিত নাছিল। বলটোৱে সোঁহাতৰ কিলাকুটিৰ ঠিক ওপৰত আঘাত কৰে।

খেলপথাৰতেই ছামি যন্ত্ৰণাত ছটফটাই উঠা দেখা গৈছিল। তেওঁ আৰু বেটিং কৰিব পৰা অৱস্থাত নাছিল।

খেল শেষ হোৱাৰ পাছতে কেপ্টেইন কোহলিয়ে ছামিৰ আঘাত সম্পৰ্কে জনাইছিল যদিও স্কেন কৰাৰ পাছতহে সৱিশেষ জানিব পৰা যাব বুলি উল্লেখ কৰিছিল।

সংবাদ প্ৰতিষ্ঠানৰ বাতৰি অনুসৰি, ছামিৰ হাত ভাঙিছে। ছামিয়ে আৰু বাকী টেষ্ট ছিৰিজৰ খেলকেইখনত অংশগ্ৰহণ কৰিব নোৱাৰিব।

ছামিৰ অবিহনে ভাৰতৰ বলিং বিভাগ দুৰ্বল হৈ পৰাৰ আশংকা কৰা হৈছে। তদুপৰি, এইবাৰ ছিৰিজত ইশান্ত শৰ্মাও নাই।

বিৰাট কোহলিও দেশলৈ উভতিছে। সেয়ে ছিৰিজৰ বাকী খেলকেইখনত বেটিং বিভাগো দুৰ্বল হৈ পৰিব বুলি আশংকা কৰা হৈছে।