নগাঁৱত ৰামেশ্বৰ বৰা সোঁৱৰণী কৃতী শিক্ষকৰ বঁটা প্ৰদান

 ” ভাল কাম কৰিলে স্বীকৃতি দিয়া হয়‌ আৰু এই স্বীকৃতিয়ে কাম কৰাৰ ক্ষেত্ৰত অনুপ্ৰেৰণা যোগায়। আনহাতে, বেয়া কাম কৰিলে গৰিহণা দিয়া হয় আৰু এই গৰিহণাই তেনে কাম নকৰিবলৈ সেইজনক সকিয়াই দিয়া হয়।”- এই মন্তব্য বিশিষ্ট শিক্ষাবিদ, লেখক ফজলুল হক মৰলৰ।

আজি নগাঁও জিলা অধিবিদ্যা পৰিষদৰ উদ্যোগত প্ৰদান কৰা কৰ্মপ্ৰাণ প্ৰয়াত ৰামেশ্বৰ বৰা সোঁৱৰণী কৃতী শিক্ষকৰ বঁটা লাভ কৰি উদমাৰী হাইস্কুলৰ প্ৰধান শিক্ষক ফজলুল হক মৰলে এই মন্তব্য কৰি লগতে আৰু কয়, “মহান ব্যক্তি প্ৰয়াত ৰামেশ্বৰ বৰাৰ স্মৃতিত প্ৰদান কৰা বঁটাই মোক অধিক দায়িত্বশীল কৰি তুলিলে।

অৱশ্যে বহুতে ভাল কৰি বঁটা নাপালেও নীৰৱে সমাজ তথা দেশৰ কাৰণে নিস্বাৰ্থ ভাবে কাম কৰি আছে।” শিক্ষক সমাজক তেওঁ ত্যাগৰ মনোভাৱেৰে কাম কৰিবলৈ আহ্বান জনাই কয়, “শিক্ষক সমাজৰ ওপৰতে সমাজৰ পৰিৱৰ্তন নিৰ্ভৰ কৰে।” সমাজৰ কাৰণে ভাল কাম কৰিলে তেওঁ এদিন নহয় এদিন স্বীকৃতি পাব‌ই বুলিও মৰলে মন্তব্য কৰে।

মৰলক প্ৰদান কৰা বঁটাত আছে গামোচা, চেলেং, জাপি, মানপত্ৰ, শৰাই আৰু এখন স্মাৰক।

 নগাঁও চৰকাৰী উচ্চতৰ মাধ্যমিক বালক বিদ্যালয়ৰ প্ৰেক্ষাগৃহত অধিবিদ্যা পৰিষদৰ সভাপতি তথা নগাঁও জিলা সংমণ্ডল বিদ্যালয় সমুহৰ পৰিদৰ্শক মৃদুল কুমাৰ নাথৰ সভাপতিত্বত অনুষ্ঠিত গাম্ভীৰ্যপূৰ্ণ সভাত অৱসৰপ্ৰাপ্ত অধ্যক্ষ ৰাণা প্ৰকাশ বৰাই কৰ্মপ্ৰাণ প্ৰয়াত ৰামেশ্বৰ বৰাৰ স্মৃতি ৰোমন্থন কৰি কৰে।

তেওঁ কয়, “কুৰি শতিকাৰ শেষৰ ফালে মধ্য নগাঁৱৰ এখন সৰু গাঁৱত জন্ম গ্ৰহণ কৰা প্ৰয়াত বৰা এগৰাকী ভোটা তৰা হিচাপে সমাজত প্ৰতিষ্ঠা লাভ কৰিছিল।

শিক্ষা জগতখনত আমূল পৰিৱৰ্তন আনিবলৈ সক্ষম হোৱা এইগৰাকী ব্যক্তিৰ প্ৰচেষ্টাত শিক্ষক সমাজৰ কাৰণে পেন্সনৰ ব্যৱস্থা হৈছে। যাৰ বাবে শিক্ষক সকলে অৱসৰৰ পিছত মৰ্যাদা সহকাৰে জীয়াই থাকিবলৈ সক্ষম হৈছে।

” শিক্ষক সকলৰ বিভিন্ন অনুষ্ঠান-প্ৰতিষ্ঠানৰ দায়িত্ব গ্ৰহণ কৰি তেওঁ শিক্ষক সমাজৰ কাৰণে বহু কাম কৰিছে বুলি উল্লেখ কৰি বৰাই কয়, “এইগৰাকী মহান শিক্ষা প্ৰেমীৰ প্ৰচেষ্টাত জিলাখনৰ মধ্য অঞ্চলত বহু কেইখন শিক্ষানুষ্ঠানে গঢ় লৈ উঠিছে ।”

 সম্পাদক সঞ্জীৱ কলিতাই আ‌ঁত ধৰা সভাখনত পৰিষদৰ কাৰ্যকৰী সভাপতি খনীদ্ৰ কুমাৰ গোস্বামী, ৰামেশ্বৰ বৰা সোৱৰণী পূৰ্বৰ বঁটা প্ৰাপক ক্ৰমে তুফাইল উদ্দিন আহমেদ, জীৱন চন্দ্ৰ বৰা, তোষেশ্বৰ শ‌ইকীয়া, নগাঁও জিলা উচ্চতৰ মাধ্যমিক শিক্ষক-কৰ্মচাৰী সন্থাৰ সাধাৰণ সম্পাদক জীতেন হাজৰিকা, নগাঁও জিলা হাইস্কুল শিক্ষক সংস্থাৰ সভাপতি ৰঞ্জিত শ‌ইকীয়াকে প্ৰমুখ্য কৰি  ভালে কেইগৰাকী বিশিষ্ট ব্যক্তি উপস্থিত থাকে।

উক্ত সভাতে ২০২০ বৰ্ষৰ উচ্চতৰ মাধ্যমিক চুড়ান্ত পৰীক্ষাৰ ফলাফলত  ৯০ শতাংশ ছাত্র-ছাত্ৰী উত্তীৰ্ণ হোৱা শিক্ষানুষ্ঠান ক্ৰমে জয়নাৰায়ণ উচ্চতৰ মাধ্যমিক বিদ্যালয়, মাধৱদেৱ উচ্চতৰ মাধ্যমিক বিদ্যালয়, কলিয়াবৰ ছোৱালী উচ্চতৰ মাধ্যমিক বিদ্যালয়, দক্ষিণপাট উচ্চতৰ মাধ্যমিক বিদ্যালয়, পুৰণিগুদাম আৰ কে বি উচ্চতৰ মাধ্যমিক বিদ্যালয়, বঢ়মপুৰ এচ এচ আই উচ্চতৰ মাধ্যমিক বিদ্যালয়ৰ লগতে বিগত মেট্ৰিক পৰীক্ষাত এশ শতাংশ উত্তীৰ্ণ জিলাখনৰ ২২খন উচ্চ মাধ্যমিক বিদ্যালয়ক উৎকৃষ্ট বিদ্যালয়ৰ বঁটা প্ৰদান কৰা হয়।

তদুপৰি, পলাশতল কাছমাৰী হাইস্কুলক ২০২০ বৰ্ষৰ বাবে শ্ৰেষ্ঠ বিদ্যালয় বটা প্ৰদান কৰা হয়।