২৬ ডিচেম্বৰত বোকাখাতত উন্মোচিত হব প্রয়াত প্ৰাক্তন মুখ্যমন্ত্ৰী তৰুণ গগৈৰ পূৰ্ণাঙ্গ প্রতিমূর্তি

বোকাখাতৰ সমষ্টিৰ প্রাক্তন বিধায়ক তথা বোকাখাত নির্মাণ গোট নামৰ বেচৰকাৰী সংগঠনৰ সভাপতি জিতেন গগৈৰ উদ্যোগত বোকাখাতত নির্মাণ কাৰ্য চলি থকা প্রাক্তন মুখ্যমন্ত্রী প্রয়াত তৰুণ গগৈৰ ১৫ ফুট উচ্চতাৰ পূৰ্ণাংগ প্রতিমূর্তিটো ২৬ ডিচেম্বৰত আনুষ্ঠানিকভাৱে উন্মোচন কৰা হ’ব ৷

২৬ডিচেম্বৰত প্ৰয়াত মুখ্যমন্ত্ৰী জনৰ অন্ত্যেষ্টিক্রিয়াৰ পৰা এমাহ দিন সম্পূর্ণ হব।

সেয়েহে প্রতিমূর্তি উন্মোচন লগতে প্রয়াত প্রাক্তন মুখ্যমন্ত্ৰীগৰাকীৰ এমহীয়া শ্ৰাদ্ধৰো আয়োজন কৰিছে জিতেন গগৈয়ে ৷

২৬ ডিচেম্বৰৰ পুৱা বন্তি প্ৰজ্বলন, প্ৰতিমূৰ্তি উন্মোচন, মাল্যাৰ্পণ আৰু সর্বধর্ম প্রার্থনাৰ লগতে মাংগলিক অনুষ্ঠানো অনুষ্ঠিত হ’ব বুলি বুধবাৰে বোকাখাতত এখন সংবাদ মেলযোগে এই কথা জনাইছে প্রাক্তন বিধায়ক জিতেন গগৈয়ে।

পুত্রবৎ স্নেহেৰে তেওঁক ৰাজনীতিত মার্গ দর্শন কৰোৱা বিশিষ্ট ৰাজনীতিবিদ তৰুণ গগৈৰ প্রতি থকা গভীৰ শ্ৰদ্ধাৰ বাবেই এই প্রতিমূর্তি নির্মাণ কৰা বুলি জিতেন গগৈয়ে জনায়।

বিপৰীতে কংগ্ৰেছৰ ৰাজনীতিৰ প্রতি সামান্যতমো দুর্বলতা নাই বুলি মন্তব্য কৰি জিতেন গগৈয়ে কয় যে মৃত্যুৰ পূর্বলেকে প্রয়াত মুখ্যমন্ত্ৰীগৰাকীৰ সৈতে আছিল মোৰ পিতা-পুত্ৰৰ সম্পৰ্ক।

বহুবাৰ জিতেন গগৈক কংগ্ৰেছ দলত যোগদান কৰিবলৈকো আহ্বান জনাইছিল তৰুণ গগৈয়ে। জিতেন গগৈয়ে এই আহ্বান প্রত্যাখ্যান কৰিছিল যদিও প্রয়াত মুখ্যমন্ত্ৰীগৰাকীক তেওঁ কেতিয়াও বেয়া পোৱা নাছিল বুলিও কয়।

জিতেন গগৈয়ে কংগ্রেছত যোগদান কৰিব বুলি ওলোৱা খবৰ অস্বীকাৰ কৰি তেওঁ কয় যে মই নিজেই এটা টিকট, মোৰ হাইকমাণ্ড মই নিজেই, নিৰ্বাচনৰ বাবে টিকট বিচাৰি মই কোনো হাইকমাণ্ডক অনুৰোধ কৰিব নালাগে। নিজেই পূর্বৰ দৰে নির্দলীয়ভাৱে প্রতিদ্বন্দ্বিতা কৰি ২০২১ৰ নিৰ্বাচনত পুনৰ বিধায়ক হম। স্বয়ং তৰুণ গগৈয়ে নিমন্ত্রণ জনাওঁতেও মই কংগ্ৰেছত যোগদান নকৰিলোঁ। এতিয়া যোগদান কৰাৰ প্ৰশ্নই নুঠে ৷

ইফালে তৰুণ গগৈৰ মৃত্যুৰ এমাহ নৌহওঁতেই একাংশ কংগ্রেছী নেতাই দল ত্যাগ কৰা কার্যক অকৃতজ্ঞ আৰু সুবিধাবাদী আখ্যা দিয়ে জিতেন গগৈয়ে।

ৰাজ্যখনৰ ভিতৰতে প্ৰয়াত প্ৰাক্তন মুখ্যমন্ত্ৰীগৰাকীৰ প্ৰথমতো প্ৰতিমূৰ্তি উন্মোচন অনুষ্ঠান আৰু ৰাজহুৱা আদ্যশ্রাদ্ধলৈ সংবাদ মাধ্যমৰ জৰিয়তে সকলো দল-সংগঠন, ভাষা-বৰ্ণ, ধৰ্মকে ধৰি সকলোকে উপস্থিত থাকিবলৈ প্রাক্তন বিধায়ক গৰাকীয়ে আহ্বান জনাইছে।