ৰাজ্যিক পৰ্যায়ৰ বিজ্ঞান প্ৰদৰ্শনীত উজলিল মঙলদৈৰ ছাত্ৰৰ দল

মঙলদৈৰ মাধ্যমিক পৰ্যায়ৰ ব্যক্তিগত শিক্ষা প্ৰতিষ্ঠানৰ এদল ছাত্ৰই ৰাজ্যিক পৰ্যায়ৰ এখন বিজ্ঞান প্ৰদৰ্শনী প্ৰতিযোগিতাত বিশেষ প্ৰশংসা বুটলিবলৈ সক্ষম হৈছে।

মিৰাজ নুৰানি, কৌশিক দাস, হিল্লোল ৰহমান, বিশাল কাশ্যপ আৰু ৰিদীপ কুমাৰ কলিতা নামৰ নৰ্থ ইষ্ট একাডেমীৰ নৱম শ্ৰেণীৰ পাঁচ গৰাকী ছাত্ৰৰ এটি দলে ৰাজ্যিক পৰ্যায়ৰ বিজ্ঞানৰ আৰ্হি প্ৰদৰ্শনী প্ৰতিযোগিতাখনত তৃতীয় পুৰস্কাৰ লাভ কৰে।

বিজ্ঞানৰ আৰ্হি প্ৰদৰ্শনীৰ প্ৰতিোগিতাখনৰ আয়োজন কৰিছিল আছাম চায়েন্স, টেকন’লজি এণ্ড এডুকেশ্যন কাউন্সিল (এএছটিইচি)য়ে। গুৱাহাটীৰ খানাপাৰাৰ অসম আঞ্চলিক বিজ্ঞান কেন্দ্ৰত এই প্ৰদৰ্শনীখন অনুষ্ঠিত হৈছিল।

এই সম্ভাৱনাপূৰ্ণ কিশোৰ বিজ্ঞানীকেইজনে গছত উঠাৰ বাবে এটা যান্ত্ৰিক সঁজুলি উদ্ভাৱন কৰিছিল যিটো গছত উঠাৰ বাবে অধিক আৰামদায়ক আৰু গছত বগোৱাজনৰ বাবে সুৰক্ষিত এটা সঁজুলি।

বিদ্যালয়খনৰ সঞ্চালকদ্বয় ৰাজশ্ৰী শৰ্মা মিশ্ৰ আৰু প্ৰতিমা ভট্টাচাৰ্যই শুকুৰবাৰে সংবাদ মাধ্যমৰ আগত এই কথা প্ৰকাশ কৰিছে।

অসম বিজ্ঞান কেন্দ্ৰত অনুষ্ঠিত এই বিজ্ঞানৰ আৰ্হি প্ৰদৰ্শনী প্ৰতিযোগিতাখনত ৰাজ্যখনৰ বহু বিদ্যালয়ে অংশগ্ৰহণ কৰিছিল আৰু বহুতো আকৰ্ষণীয় আৰ্হি দাঙি ধৰিছিল।

বিজ্ঞানক ছাত্ৰ-ছাত্ৰীৰ মাজত জনপ্ৰিয়  কৰি তোলাৰ লক্ষ্যৰে অনুষ্ঠিত বিজ্ঞান প্ৰদৰ্শনীখন বহু অনুসন্ধিৎসু লোকে পৰিদৰ্শন কৰিছিল আৰু কিশোৰ বিজ্ঞানীসকলৰ কৰ্মৰ প্ৰশংসা কৰিছিল।