মহামাৰীৰ দ্বিতীয় বৰ্ষ প্ৰথম বৰ্ষতকৈ অধিক ভয়াবহ হ’ব পাৰে : বিশ্ব স্বাস্থ্য সংস্থা

বিশ্ব স্বাস্থ্য সংস্থাৰ জৰুৰীকালীন সঞ্চালক মিখাইল ৰিয়ানে ক’ৰ’না মহামাৰীয়ে দ্বিতীয় বৰ্ষত কেনেধৰণৰ ৰূপ ধাৰণ কৰিব পাৰে সেই সম্পৰ্কে মতামত দাঙি ধৰিছে।

বিশ্ব স্বাস্থ্য সংস্থাৰ জৰুৰীকালীন সঞ্চালক গৰাকীয়ে উল্লেখ কৰা অনুসৰি মহামাৰীৰ দ্বিতীয় বৰ্ষটো প্ৰথম বৰ্ষতকৈ অধিক কঠিন হ’ব পাৰে।

ভাইৰাছৰ বিধ কেনেধৰণৰ নতুন বিভিন্নতাৰে সংক্ৰমিত হৈছে তাৰ ওপৰত নিৰ্ভৰ  কৰি দ্বিতীয় বৰ্ষত মহামাৰীয়ে কেনে ৰূপ ধাৰণ কৰিব সেই সম্পৰ্কে অনুধাৱন কৰিব পৰা যায় বুলিও মিখাইল ৰিয়ানে লগতে কয়।

উত্তৰ গোলাৰ্ধত বিশেষকৈ ইউৰোপ আৰু উত্তৰ আমেৰিকাত ক’ৰ’না মহামাৰীয়ে নতুনকৈ সংক্ৰমণ আৰম্ভ কৰাৰ প্ৰসংগও এইক্ষেত্ৰত উল্লেখ কৰে মিখাইল ৰিয়ানে।

শীতৰ দিনত জনসাধাৰণে সামাজিক দূৰত্ব এৰাই চলি মহামাৰীৰ প্ৰতি দায়িত্বজ্ঞানহীন হ’লেও মহামাৰীৰ দ্বিতীয় বৰ্ষটো অধিক কঠিন হোৱাৰ সম্ভাৱনা থাকে।

উল্লেখযোগ্য যে, আমেৰিকাৰ লগতে ব্ৰিটেইনৰ বিভিন্ন প্ৰান্তত ক’ৰ’না মহামাৰীৰ পুনৰ সংক্ৰমণে গুৰুতৰ ৰূপ ধাৰণ কৰা পৰিলক্ষিত হৈছে।

ব্ৰিটেইন চৰকাৰে নতুন ক’ৰ’না ভাইৰাছৰ সংক্ৰমণৰ পৰা বচাৰ বাবে দেশখনৰ বিভিন্ন স্থানত পুনৰ ল’কডাউনো ঘোষণা কৰিছিল।