কেতিয়া অনুষ্ঠিত হ’ব আইপিএল-২০২১? বিচিচিআইয়ে দিলে গুৰত্বপূৰ্ণ ইংগিত

বিচিচিআইয়ে এইবাৰ আইপিএল-২০২১ৰ সম্ভাৱ্য সময় তাৰিখৰো ইংগিত দাঙি ধৰিছে। ইয়াৰ পূৰ্বে বিচিচিআইয়ে এইবাৰৰ আইপিএল যে ভাৰততে অনুষ্ঠিত কৰিব বিচাৰে সেয়া জনাইছিল।

দেশৰ মাটিত চৈয়দ মুস্তাক আলী ট্ৰফী অনুষ্ঠিত হোৱাৰ পাছত ইংলেণ্ডৰ বিৰুদ্ধে আন্তৰ্জাতিক টেষ্ট মেচ অনুষ্ঠিত হ’বলৈ আগবাঢ়িছে।

বোৰ্ডৰ ফালৰ পৰা কোৱা হৈছে যে এইবাৰ ৰঞ্জী ট্ৰফী অনুষ্ঠিত নহয় যদিও বিজয় হাজাৰে ট্ৰফীৰ লগতে মহিলাৰ এদিনীয়া মেচ অনুষ্ঠিত কৰা হ’ব।

ফেব্ৰুৱাৰি আৰু মাৰ্চত এই দুখন প্ৰতিযোগিতা অনুষ্ঠিত হৈ যোৱাৰ পাছতেই আয়োজন কৰা হ’ব ইণ্ডিয়ান প্ৰিমিয়াৰ লীগ।

স্বাভাৱিক অৱস্থা ঘুৰি অহাৰ সম্ভাৱনাৰে এপ্ৰিল-মে মাহত আইপিএল-২০২১অনুষ্ঠিত হ’ব। জানিব পৰা মতে, এপ্ৰিলৰ দ্বিতীয় সপ্তাহত আৰম্ভ হ’ব পাৰে আইপিএল।

এপ্ৰিলৰ ১১ৰ পৰা ১৪ৰ ভিতৰত আইপিএল আৰম্ভ হোৱাৰ সম্ভাৱনা আছে। এই প্ৰতিযোগিতা জুন মাহৰ প্ৰথম ভাগলৈকে চলিব। জুনৰ প্ৰথম সপ্তাহতে প্ৰতিযোগিতা সমাপ্ত হোৱাৰ সম্ভাৱনা আছে।

বাতৰি অনুসৰি, বিচিচিআইয়ে ইয়াৰ মাজতে আইপিএলত আৰু এটা নতুন দলৰ বাবে বিড আহ্বান কৰিব পাৰে।

বিচিচিআইয়ে ২০২২ৰ আইপিএলৰ পৰা নতুন দুটা দলক প্ৰতিযোগিতাখনত অন্তৰ্ভুক্ত কৰাৰ সিদ্ধান্ত লৈছিল।