আগন্তুক নিৰ্বাচনত ১২৬ টা সমষ্টিতে অসম জাতীয় পৰিষদে প্ৰাৰ্থিত্ব আগবঢ়াব : লুৰিণজ্যোতি গগৈ

উত্তৰ মাৰ্ঘেৰিটাৰ ৰংগমঞ্চত বৃহস্পতিবাৰে অনুষ্ঠিত ‘জাতীয় জাগৰণ সমাৱেশ’ত মুখ্য অতিথি হিচাপে উপস্থিত থাকে অসম জাতীয় পৰিষদৰ সভাপতি লুৰিণজ্যোতি গগৈ।

অনুষ্ঠানত উপস্থিত থাকি লুৰিণজ্যোতি গগৈয়ে অসমৰ ১২৬ টা বিধানসভা সমষ্টিতে অসম জাতীয় পৰিষদে প্ৰাৰ্থী দিব বুলি ঘোষণা কৰে।

আনহাতে, ৰাষ্ট্ৰীয় শক্তি সমূহক ওফৰাই অসমত এইবাৰ জাতীয়তাবাদৰ চৰকাৰ স্থাপন হ’ব বুলিও গগৈয়ে লগতে কয়।

ইপিনে, এ আই য়ু ডি এফে যিদৰে শংকৰদেৱক চাহব বুলি কোৱা আৰম্ভ কৰিছে ঠিক সেইদৰে বিজেপিয়েও শ্ৰীমন্ত শংকৰদেৱক শংকৰ বাবা বুলি কৈছিল গতিকে এনে সাম্প্ৰদায়িক বিষবাষ্পৰে ৰাজনীতি কৰা দল সমূহক অসমৰ ৰাইজে বিদায় দিব লাগিব বুলিও লুৰিণজ্যোতি গগৈয়ে কয়।

কংগ্ৰেছৰ ৰিপুণ বৰাই এজেপিয়ে কংগ্ৰেছৰ লগত মিত্ৰতা নকৰিলে শূন্য আসন পাব বুলি কৰা মন্তব্যৰ উত্তৰত লুৰিণজ্যোতিয়ে কংগ্ৰেছৰ নিয়ন্ত্ৰণত ই ভি এম মেচিন আছে নেকি বুলি প্ৰশ্ন কৰে।

‘‘নিৰ্বাচনত জনতাই উত্তৰ দিব। কোনে কিমান আসন পাব আগতিয়াকৈ জানিবলৈ ই ভি এম কংগ্ৰেছৰ নিয়ন্ত্ৰণত আছে নেকি?,’’ লুৰিণ জ্যোতি গগৈৰ উত্তৰ।