বাটবোৰ এতিয়া বন্ধ হৈ আহিছে : অখিলৰ পত্নী গীতাশ্রী

আজি উচ্চতম ন্যায়ালয়ে কাৰাৰুদ্ধ কৃষক নেতা অখিল গগৈৰ জামিন আবেদনৰ শুনানি নাকচ কৰাৰ পাছতে যেন ভাঙি পৰিছে অখিল গগৈৰ পত্নী গীতাশ্ৰী তামুলী।

তেওঁলোকৰ শেষ ভৰসা উচ্চতম ন্যায়ালয়ে অখিল গগৈৰ জামিন আবেদনৰ শুনানি নাকচ কৰাৰ পাছতেই দুখত ম্ৰিয়মান হৈ ফেচবুকৰ জৰিয়তে প্ৰতিক্ৰিয়া প্ৰকাশ কৰিছে।

প্ৰথমতে ফেচবুকত তেওঁ ইংৰাজী ভাষাত লিখি কয়, ‘Where there seems to be no way, god will make one.’

যাৰ অৰ্থ হৈছে যেতিয়া সকলোবোৰ পথ বন্ধ হৈ যায় তেতিয়াই ভগৱানে নতুনকৈ এটা পথ সৃষ্টি কৰে।

তেওঁ লগতে ‘বাটবোৰ এতিয়া বন্ধ হৈ আহিছে।‘ উল্লেখ কৰি কয় ‘বাটবোৰ বন্ধ কৰি দিয়া হৈছে। ভাৰতীয় গণতন্ত্ৰত ন্যায় বিচাৰি আমি যাব পৰা শেষ ঠাই কন আছিল উচ্চতম ন্যায়ালয়।‘

‘ন্যায়ালয়ে যদি কৈ দিয়ে তহঁতৰ কথা শুনাৰেই সময় নাই, শুনাৰ কোনো দৰকাৰ নাই, তেন্তে আমি ক’লৈ যাম? শক্তিমন্ত হাতে বন্ধ কৰি দিয়া দুৱাৰত মূৰ আফালি থাকিম?’ অখিলৰ পত্নীয়ে প্ৰশ্ন কৰি কয়।

ইপিনে, ৰাজসাক্ষী নামৰ এখন গোপন নাটক কৰা বুলি উল্লেখ কৰি তামুলীয়ে লগতে কয়, ‘তাৰ পাছত, এনে পৰিচয় গোপন কৰা সাক্ষী আৰু ভুল তথ্যৰ আধাৰত উচ্চ ন্যায়ালয়ৰ দ্বাৰা জামিন নাকচ। আৰু এতিয়া?’

‘নাগৰিকৰ অধিকাৰ বোলা কথাটোৰ কি হ’ব? ক’লৈ যাব সাধাৰণ মানুহ? এইদৰে প্ৰশ্ন উত্থাপন কৰি তামুলীয়ে লগতে কয়, ‘হয়তো আজিৰ পৰা সকলো কথাকে ন কৈ ভাবিব লাগিব!’

ফেচবুক পোষ্টটোৰ শেষত অখিল পত্নীয়ে লিখি কয়, ‘আপোনালোকৰ কুশল হওক, হে’ শক্তিমন্ত অদৃশ্যসকল! যি জয়ী হয়, তেওঁৰেই জয়জয় হয়। বিধাতা পুৰুষৰ সুদৃষ্টিৰে আপোনালোক একোজন মহান অধিনায়ক! পূবৰ পৰা, পশ্চিমৰ পৰা, উত্তৰ-দক্ষিণ-সকলো দিশৰ পৰাই ভকতিৰ অজস্ৰ প্ৰণিপাত!!!’

উল্লেখযোগ্য যে, উচ্চতম ন্যায়ালয়ৰ ন্যায়াধীশ এন ভি ৰামানা, সুৰ্য কান্ত আৰু অনিৰুদ্ধ বসুৰ তিনিজনীয়া বিচাৰপীঠে কৃষক নেতা অখিল গগৈৰ জামিন আবেদন খাৰিজ কৰিছে।

ইয়াৰ পূৰ্বে যোৱা ৭ জানুৱাৰিত গুৱাহাটী উচ্চ ন্যায়ালয়ে কৃষক নেতাগৰাকীৰ জামিন নামাঞ্জুৰ কৰিছিল।

গুৱাহাটী উচ্চ ন্যায়ালায়ে অখিল গগৈৰ জামিন খাৰিজ কৰাৰ পিছত কৃষক নেতাগৰাকীয়ে উচ্চতম ন্যায়ালয়ৰ দাৰস্থ হৈছিল।

উল্লেখযোগ্য যে, কা-বিৰোধী আন্দোলনৰ সময়তে ৰাজ্যৰ কেইবাখনো থানাত অখিল গগৈৰ বিৰুদ্ধে গোচৰ ৰুজু হৈছিল। তাৰে দুটা গোচৰ NIA ই তদন্তৰ বাবে লৈছিল।

অখিলৰ বিৰুদ্ধে চাবুৱা থানাত ৬ টা, ডিব্ৰুগড়ত ১ টা, গৌৰীসাগৰ থানাত ১ টা, শিৱসাগৰ থানাত ১ টা, টিয়ক থানাত ১টা, যোৰহাট থানাত এটা আৰু ক্ৰাইম ব্ৰাঞ্চত এটা আৰু চান্দমাৰি থানাত ১ টা গোচৰ ৰুজু হৈছিল।

চান্দমাৰি থানাক বাদ দি বাকীকেইটা গোচৰত ইতিমধ্যে জামিন লাভ কৰিলে অখিলে।

যোৱা এবছৰে কাৰাৰুদ্ধ অখিল গগৈ বিভিন্ন ৰোগত আক্ৰান্ত হৈ বৰ্তমান GMCHত চিকিৎসাধীন হৈ আছে।