গুৱাহাটী প্ৰেছ ক্লাৱৰ বিৰুদ্ধে লতাশিল আৰক্ষী থানাত কিয় গোচৰ ৰুজু কৰিলে বিশ্বজিৎ নাথে?

গুৱাহাটী প্ৰেছ ক্লাৱৰ বিৰুদ্ধে গোচৰ তৰিলে গুৱাহাটীৰ ভেটাপাৰাৰ এজন লোকে।

গুৱাহাটী প্ৰেছ ক্লাৱৰ সমিতিয়ে আলফা(স্বা)ৰ সংবাদমেল আয়োজনৰ ব্যৱস্থা গ্ৰহণ কৰাৰ অভিযোগ তুলি বিশ্বজিৎ নাথে লতাশিল থানাত এক গোচৰ ৰুজ কৰে৷

গুৱাহাটী প্ৰেছ ক্লাবৰ সভাপতি আৰু সাধাৰণ সম্পাদকৰ বিৰুদ্ধে এই গোচৰ ৰুজু কৰা হৈছে বুলি তেওঁ জনায়।

গোচৰ ৰুজু কৰি আহি নাথে সংবাদ মাধ্যমৰ আগত কয় ‘বেআইনা প্ৰতিৰোধী আইন ১৯৬৭ অনুসৰি কোনো নিষিদ্ধ ঘোষিত সংগঠনৰ মুৰব্বীৰ বক্তব্য কোনো সংবাদ মাধ্যমে গ্ৰহণ কৰাটো আইনমতে দণ্ডনীয়৷ তেনেস্থলত গুৱাহাটী প্ৰেছ ক্লাবৰ বিষয়ববীয়াই যোৱা ২১ ফেব্ৰুৱাৰিত আলফা(স্বা)ৰ হৈ টেলিফোনিক কনভাৰ্চেশ্যন শুনোৱাৰ বাবে কেনেকৈ পদক্ষেপ ল’লে?

নাথে এজাহাৰত উল্লেখ কৰা অনুসৰি, ‘গুৱাহাটী প্ৰেছ ক্লাবৰ সভাপতি মনোজ নাথ আৰু সম্পাদক সঞ্জয় ৰয়ে আলফা সেনাধ্যক্ষ পৰেশ বৰুৱাৰ সেই ভাৰ্চুৱেল সংবাদমেলখনৰ আয়োজন কৰি প্ৰেছ ক্লাবৰ সভা গৃহত বৰুৱাৰ ভিডিঅ’ ক’লৰ অপেক্ষা কৰি বহি থকা বিভিন্ন দৃশ্য শ্ৰাব্য মাধ্যমত দেখিবলৈ পোৱা গৈছিল৷’

ইপিনে, গুৱাহাটী প্ৰেছ ক্লাৱ কতৃপক্ষৰ বিৰুদ্ধে ব্যৱস্থা গ্ৰহণৰ বাবে নাথে অসম চৰকাৰ আৰু আৰক্ষী প্ৰশাসনক দাবী জনায়।

উল্লেখ্য যে, ২১ ফেব্ৰুৱাৰীত কুইপ’ৰ দুই অপহৃত বিষয়াৰ শেহতীয়া স্থিতিৰ সন্দৰ্ভত মন্তব্য কৰাৰ বাবে পোন প্ৰথমবাৰৰ বাবে ভিডিঅ’ কনফাৰেঞ্চিঙৰ জড়িয়তে সংবাদমেলৰ আয়োজন কৰিছিল আলফা(স্বা)এ ৷ কিন্তু পৰৱৰ্তী সময়ত আৰক্ষীৰ হস্তক্ষেপত বা অন্যান্য আইনগত দিশৰ প্ৰতি লক্ষ্য ৰাখি উক্ত সংবাদমেল অনুষ্ঠিত কৰাৰ পৰা বিৰত আছিল গুৱাহাটী প্ৰেছ ক্লাৱ কতৃপক্ষ ৷

তাৰ বিপৰীতে অনানুষ্ঠানিকভাৱে এগৰাকী সাংবাদিকলৈ আলফাৰ সেনাধক্ষ্যই ফোন কৰিছিল তেওঁৰ বক্তব্যখিনি অৱগত কৰিছিল।