হাফলঙত ডিমা হাচাও জিলাৰ আশাকৰ্মীৰ বাৰ্ষিক সমাৱেশ

হাফলং ডিষ্ট্ৰিক্ট হেলথ চচাইটিৰ উদ্যোগত আজি হাফলং কালচাৰাল ইনস্টিটিউট হলত স্বাস্থ্য বিভাগৰ দ্বাৰা আশাকৰ্মীসকলৰ বাৰ্ষিক সমাৱেশ আয়োজন কৰা হয়।

অনুষ্ঠানটোত ডিমা হাচাও জিলাৰ বিভিন্ন প্ৰান্তৰ পৰা অহা মুঠ ২৩৮ গৰাকী আশাকৰ্মীয়ে অংশগ্ৰহণ কৰে।

সমাৱেশখনত উত্তৰ কাছাৰ পাৰ্বত্য স্বায়ত্ত শাসিত পৰিষদৰ স্বাস্থ্য আৰু পৰিয়াল কল্যাণ দপ্তৰৰ ই এম চ্যামুয়াল চাঙছান, পাৰ্বত্য পৰিষদৰ প্ৰধান সচিব টি টি দাউলাগুপু আৰু জিলা স্বাস্থ্য বিভাগৰ যুটীয়া সঞ্চালক ডা দিপালী বৰ্মন মুখ্য অতিথি হিচাপে উপস্থিত থাকে।

উক্ত সমাৱেশখনত আশাকৰ্মী সকলৰ বিভিন্ন সমস্যা সমূহৰ ওপৰত আলোচনা হোৱাৰ লগতে আশাকৰ্মীসকলে আগবঢ়াই অহা সেৱাৰ বাবে তেওঁলোকক চৰকাৰী ভাবে সম্বৰ্ধনা জনোৱা হয়।

সভাত ভাষণ প্ৰদান কৰি ই এম চাঙছানে কয় যে আশাসকলে পাৰ্বত্য জিলাখনৰ বিভিন্ন দুৰ্গম এলেকাত যিদৰে সেৱা আগবঢ়াই আহিছে সেয়া সঁচাকৈয়ে প্ৰশংসনীয়। কিন্তু তাৰ বিনিময়ত তেওঁলোকে নগন্য পাৰিশ্ৰমিক লাভ কৰি আহিছে বুলি উল্লেখ কৰি আগন্তুক দিনত চৰকাৰে আশাকৰ্মীসকলৰ কল্যাণাৰ্থে নিশ্চয় ভাল পদক্ষেপ গ্ৰহণ কৰিব বুলি চাঙছানে আশা ব্যক্ত কৰে।

স্বাস্থ্য বিভাগৰ যুটীয়া সঞ্চালক ডা দিপালী বৰ্মনে কয় যে আশাকৰ্মীসকল স্বাস্থ্য বিভাগৰ মেৰুদণ্ড। বিশেষকৈ ডিমা হাচাও জিলাৰ স্বাস্থ্য বিভাগক আগুৱাই নিয়াৰ ক্ষেত্ৰত আশা সকলৰ অবদান উল্লেখযোগ্য ।

আনহাতে, বহুত সমস্যাৰ মাজেৰে কাম কৰি অহা সত্ত্বেও সেই অনুপাতে পাৰিশ্ৰমিক লাভ নকৰাত সমাৱেশত আশাকৰ্মী সকলে তেওঁলোকৰ পাৰিশ্ৰমিক বৃদ্ধি কৰাৰ কাৰনে দাবি জনায়।