নৃশংস: নিৰ্বাচনৰ প্ৰাকক্ষণত মাৰ্ঘেৰিটাত বিজেপি নেতাক হানি-খুছি হত্যা

আজি সন্ধিয়া ১২৪ নং মাৰ্ঘেৰিটা বিধান সভা সমষ্টিৰ বুঢ়ীদিহিং গাঁও পঞ্চায়ত তথা বৰডুমচা থানাৰ অন্তৰ্গত ডুমডুমা- নগাঁৱত ৰাজনৈতিক সংঘাতৰ বলি হৈ প্ৰাণ বিসৰ্জন দিব লগা হয় এজন বিজেপি দলৰ বুথ সভাপতিয়ে ।

ঘটনাৰ বিৱৰণী অনুসৰি আজি সন্ধিয়া দলীয় সভা সামৰি আহি বাৰীত কৰ্মৰত অৱস্থাত থাকোতে বিজেপি দলৰ ডুমডুমা-নগাঁ‌ও বুথ সমিতিৰ সভাপতি দেবানন্দ গগৈক পূৰ্বৰে পৰা চোপ লৈ থকা স্থানীয় এজন যুৱকে পাছফালৰ পৰা চোকা অস্ত্ৰৰে আঘাত কৰে।

গুৰুতৰভাৱে আহত দেৱানন্দ গগৈ (৪৮)ক নিকটৱৰ্তী অৰুণাচল প্ৰদেশৰ বৰডুমচা চৰকাৰী চিকিৎসালয়লৈ নিয়া হৈছিল যদিও আদবাটতে তেওঁ শেষ নিশ্বাস ত্যাগ কৰে।

জনা মতে স্থানীয় জয় চন্দ্ৰ গগৈ নামৰ নৱগঠিত অসম জাতীয় পৰিষদৰ সদস্যজনে বৈৰী দলটোৰ বিষয়ববীয়াজনক আক্ৰমণৰ লক্ষ্য কৰি লয়।

গাঁওবুঢ়া কেশৱ ভক্তিয়াৰীৰ পৰা জানিব পৰা মতে দিনৰ ভাগতো জয়চন্দ্ৰই দাৰে আঘাত হনাৰ চেষ্টা কৰিছিল দেৱানন্দক।

আনহাতে হত্যাকাৰী জয়চন্দ্ৰ মানসিকভাৱে বিকাৰগ্ৰস্ত বুলি জানিব পৰা গৈছে।

অন্যহাতে এইয়া ৰাজনৈতিক হত্যা নে আন কিবা সেইয়া আৰক্ষীৰ তদন্তহে স্পষ্ট হ’ব বুলি সূত্ৰত প্ৰকাশ।

ইতিমধ্যেই বৰডুমচা আৰক্ষী থানাই সমগ্ৰ ঘটনাৰ তদন্ত আৰম্ভ কৰিছে বুলি জানিব পৰা গৈছে।