ধৰ্ষিতাক যৌন সম্ভোগৰ প্ৰস্তাৱ দি গ্ৰেপ্তাৰ হ’ল সহকাৰী আৰক্ষী আয়ুক্ত : চৰকাৰে দিলে বাধ্যতামূলক অৱসৰ

এগৰাকী ধৰ্ষিতাক যৌন সম্ভোগৰ প্ৰস্তাৱ দি গ্ৰেপ্তাৰ হৈছে ৰাজস্থানৰ এগৰাকী সহকাৰী আৰক্ষী আয়ুক্ত।

উল্লেখ্য যে ৫২ বছৰীয়া আৰক্ষী বিষয়াগৰাকীয়ে এগৰাকী ধৰ্ষিতাক আইনী পদক্ষেপ গ্ৰহণৰ বিনিময়ত তেওঁৰ সৈতে যৌন সম্ভোগ কৰিবলৈ জোৰ কৰিছিল। ইয়াৰ পিছতে ধৰ্ষিতাগৰাকীয়ে সহকাৰী আৰক্ষী আয়ুক্তগৰাকীৰ বিৰুদ্ধে অভিযোগ দাখিল কৰে।

উক্ত অভিযোগৰ ভিত্তিত যোৱা ১৪ মাৰ্চত কৈলাশ চান্দ ব’হ্ৰা নামৰ সহকাৰী আৰক্ষী আয়ুক্তগৰাকীক ৰাজস্থান আৰক্ষীৰ দুৰ্নীতি নিবাৰক শাখাই গ্ৰেপ্তাৰ কৰে।

আনহাতে শনিবাৰে আৰক্ষী বিষয়াগৰাকীক বাধ্যতামূলক অৱসৰ প্ৰদান কৰিছে ৰাজস্থান চৰকাৰে। ৰাজ্যখনৰ মুখ্য সচিব(গৃহ) অভয় কুমাৰে কয় যে ‘ৰাজহুৱা স্বাৰ্থ’ৰ খাতিৰত সহকাৰী আয়ুক্তগৰাকীক বাধ্যতামূলক অৱসৰ প্ৰদান কৰা হৈছে।

ৰাজস্থান অসামৰিক সেৱা(পেঞ্চন) নীতি ১৯৯৬ৰ ৫৩(১) ধাৰাৰ অধীনত ২৪ বছৰ আৰক্ষী বিভাগত সেৱা আগবঢ়োৱা বিষয়াগৰাকীক এই অৱসৰ প্ৰদান কৰা হৈছে বুলি নিৰ্দেশনাটোত কোৱা হৈছে।

উল্লেখ্য যে ৰাজস্থান আৰক্ষীৰ দুৰ্নীতি নিৰ্বাৰক শাখাই গ্ৰেপ্তাৰ কৰা ব’হ্ৰাই ধৰ্ষিতা মহিলাগৰাকীক আইনী পদক্ষেপ গ্ৰহণৰ বাবে প্ৰথমে ধন দাবী কৰিছিল। ধন দিবলৈ অমান্তি হোৱাত মহিলাগৰাকীক পিছত যৌন সম্ভোগৰ প্ৰস্তাৱ দিছিল আৰক্ষী বিষয়াগৰাকীয়ে।

বৰ্তমান সহকাৰী আৰক্ষী আয়ুক্তগৰাকীৰ বিৰুদ্ধে তদন্ত প্ৰক্ৰিয়া অব্যাহত ৰাখিছে ৰাজস্থান আৰক্ষীৰ দুৰ্নীতি নিবাৰক শাখাই।