এ এম চিৰ ২৩ মাৰ্চৰ সাক্ষাৎকাৰত কলা শাখাৰ লেবৰেটৰী টেকনিচিয়ানক বঞ্চিত কৰাৰ অভসন্ধি  

অহা ২৩ মাৰ্চত ডিব্ৰুগড় অসম চিকিৎসা মহাবিদ্যালয়ত (এ এম চি) অনুষ্ঠিত হ’বলগীয়া সাক্ষাৎকাৰ প্ৰক্ৰিয়াৰো চূড়ান্ত অনিময়ৰ অভিযোগ উত্থাপন হোৱা পৰিলক্ষিত হৈছে। কলা শাখাত উত্তীৰ্ণ হৈ লেবৰেটৰী টেকনিচিয়ান পঢ়াসকলক সাক্ষাতকাৰৰ পৰা বঞ্চিত কৰাৰ এক ভিতৰুৱা অভিসন্ধি চলা বুলি গুৰুতৰ অভিযোগ কৰিছে একাংশ প্ৰাৰ্থীয়ে।

তাৎপৰ্যপূৰ্ণ যে, সাক্ষাৎকাৰৰ বাবে আবেদন কৰা একাংশ লেবৰেটৰী টেকনিচিয়ানে কলা শাখাৰ পৰা উত্তীৰ্ণ হোৱা। ইয়াৰে আকৌ অধিকাংশই অসম চিকিৎসা মহাবিদ্যালয়ত (এ এম চি) বহু বছৰ ধৰি সেৱা আগবঢ়াই আহিছে।

সেয়ে এনে একাংশ লেবৰটৰী টেকনিচিয়ানে বিষয়বস্তুটোৰ গুৰুত্ব বুজি সাক্ষাৎকাৰত কলা আৰু বিজ্ঞান উভয় শাখাতে উত্তীৰ্ণ টেকনিচিয়ানক অগ্ৰাধিকাৰ দিবলৈ অসমৰ স্বাস্থ্য মন্ত্ৰী আৰু স্বাস্থ্য শিক্ষা সঞ্চালকক আহ্বান জনাইছে।

উল্লেখযোগ্য যে, ২০০৯ চনৰ আগলৈকে সকলো চিকিৎসা মহাবিদ্যালয়ত প্ৰথম বৰ্ষৰ চাৰ্টিফিকেট ক’ৰ্ছ পঢ়া শিক্ষাৰ্থীক সুবিধা দিছিল। অৰ্থাৎ সেইসকলেই আৰম্ভণিৰ পৰা সেৱা আগবঢ়াই আহিছে। এতিয়া বিজ্ঞান শাখাৰ লেবৰেটৰী টেকনিচিয়ানসকল অহাৰ পাছত কলা শাখাৰ টেকনিচিয়ানসকলক বঞ্চিত কৰাটো যুক্তিসংগত নহয় বুলিও তেওঁলোকে জনায়।

অহা ২৩ মাৰ্চত এ এম চিত অনুষ্ঠিত কৰিবলৈ লোৱা লেবৰেটৰী টেকনিচিয়ানৰ মৌখিক পৰীক্ষা সাময়িকভাবে বাতিল কৰিবলৈ স্বাস্থ্য শিক্ষা সঞ্চালকক দাবী জনাইছে।

কলা শাখাত উত্তীৰ্ণ হৈ পাছলৈ লেবৰেটৰী টেকনিচিয়ান হোৱা সকলে বছৰ বছৰ ধৰি প্ৰতিখন চিকিৎসা মহাবিদ্যালয়ত স্থায়ীভাৱে সেৱা আগবঢ়াই অহাৰ পাছত কি যুক্তিত এতিয়া তেওঁলোকক বঞ্চিত কৰাৰ পৰিকল্পনা কৰা হৈছে তাক লৈ সৰ্বত্ৰে প্ৰশ্ন উত্থাপন হৈছে।

উল্লেখযোগ্য যে ইয়াৰ পূৰ্বেও গুৱাহাটী মেডিকেল কলেজত অনুষ্ঠিত লেবৰেটৰী টেকনিচিয়ান পদৰ সাক্ষাৎকাৰত ব্যাপক অনিয়ম হোৱাৰ অভিযোগ উহ্থাপন হৈছিল।  কিন্তু এতিয়া এই সম্পৰ্কত স্বাস্থ্য মন্ত্ৰী ড০ হিমন্ত বিশ্ব শৰ্মাই কি পদক্ষজ্ঞেপ গ্ৰহণ কৰে সেয়া লক্ষ্যণীয় হ’ব।