কংগ্ৰেছ প্ৰাৰ্থীক আক্ৰমণৰ লক্ষ্য! হতাশাত ভূগিছে নেকি শাসকীয় দলৰ নেতা-কৰ্মী?

অসম বিধানসভাৰ প্ৰথম পৰ্যায়ৰ নিৰ্বাচন অহা ২৭ মাৰ্চত অনুষ্ঠিত হ’ব। ইয়াৰ বাবে বিজেপি, কংগ্ৰেছকে ধৰি ৰাজনৈতিক দল তথা আন প্ৰাৰ্থীসকলে নিৰ্বাচনী প্ৰচাৰ তীব্ৰ কৰি তুলিছে।

ইয়াৰ মাজতে বিক্ষিপ্তভাৱে সংঘটিত হৈছে কেইটামান হিংসাত্মক ঘটনা। কংগ্ৰেছ প্ৰাৰ্থীক লক্ষ্য কৰি বিজেপিৰ সমৰ্থকে আক্ৰমণ কৰাৰ অভিযোগ উত্থাপন হৈছে।

দেওবাৰে শিৱসাগৰ জিলাৰ থাওৰা সমষ্টিৰ কংগ্ৰেছ প্ৰাৰ্থী সুশান্ত বৰগোহাইক অজ্ঞাত লোকে আক্ৰমণ কৰাৰ ঘটনা সংঘটিত হৈছে।

বৰগোঁহাইক প্ৰচাৰৰ বাবে থাওৰাত থকাৰ সময়তে আক্ৰমণ কৰা হৈছিল। ঘটনাটো ৰাজমাই চাহ উদ্যোগৰ সন্মুখত সংঘটিত হৈছিল।

বৰগোহাইয়ে অভিযোগ কৰা মতে এনে অভূতপূৰ্ব আক্ৰমণৰ আঁৰত বিজেপি প্ৰাৰ্থী কুশল দুৱাৰীৰ সমৰ্থকসকল আছে।

সেইদৰে, একেধৰণৰ ঘটনা সংঘটিতো হৈছে হাফলং সমষ্টিতো।

নিখিল ভাৰত মহিলা কংগ্ৰেছ কমিটিৰ সাধাৰণ সম্পাদক দানাছাৰি অনসূয়াই বিজেপিৰ গুণ্ডা বাহিনীয়ে কংগ্ৰেছৰ কাৰ্যকৰ্তাৰ ওপৰত আক্ৰমণ চলোৱাৰ অভিযোগ উত্থাপন কৰিছে।

আনহাতে, কৰিমগঞ্জৰ পাথাৰকান্দি সমষ্টিৰ কংগ্ৰেছ প্ৰাৰ্থী শচীন চাহুৰ নিৰ্বাচনী কাৰ্যালয়তো আক্ৰমণৰ ঘটনা সংঘটিত হয়। তদুপৰি, প্ৰাৰ্থীগৰাকীৰ বাহনলৈয়ো শিলগুটি নিক্ষেপ কৰা হয়।

কংগ্ৰেছ সমৰ্থকসকলে এনে আক্ৰমণৰ বিৰুদ্ধে আনকি থানাৰ সন্মুখত প্ৰতিবাদো সাৱ্যস্ত কৰে। প্ৰাৰ্থীগৰাকীয়ে নিজেও ৰাজপথত প্ৰতিবাদ সাৱ্যস্ত কৰে।

এনে হিংসাত্মক ঘটনাৰ আঁৰত সন্দেহযুক্ত বিজেপি কৰ্মী থকাৰ অভিযোগ উত্থাপিত হৈছে।

নিৰ্বাচনৰ সময়ত এইদৰে কংগ্ৰেছ প্ৰাৰ্থীক লক্ষ্য কৰি আক্ৰমণৰ ঘটনাই শাসকীয় ক্ষমতাসীন দলৰ নেতা-কৰ্মীৰ হতাশাৰ প্ৰতিফলন বুলি ক’ব খোজে একাংশ সচেতন লোকে।

শাসনাধীষ্ঠ বিজেপি দলৰ বিৰুদ্ধে কংগ্ৰেছে ইতিমধ্যে প্ৰথম পৰ্যায়ৰ নিৰ্বাচনৰ বাবে প্ৰচাৰ তীব্ৰ কৰি তুলিছে।

কংগ্ৰেছৰ নিৰ্বাচনী প্ৰচাৰৰ সভাসমূহত তথা প্ৰাৰ্থীসকলৰ প্ৰতি সমৰ্থনত সমষ্টিসমূহত ব্যাপক সঁহাৰি লাভ কৰা দেখা গৈছে।

কংগ্ৰেছৰ এনে উত্থানত শংকিত হৈয়েই হতাশাত ভোগা শাসকীয় দলৰ নেতা-কৰ্মীয়ে এনে আক্ৰমণ সংঘটিত কৰাৰ অভিযোগ উঠিছে।