বৰপেটাৰ ৬ সমষ্টিত মুঠ প্ৰাৰ্থী ৬১ গৰাকী; অবৈধ ধন সৰবৰাহ ৰোধত তৎপৰ জিলা প্ৰশাসন

বৰপেটা জিলাত অহা ৬ এপ্ৰিলত অনুষ্ঠিত হব লগা নিৰ্বাচন সন্দৰ্ভত দেওবাৰে বৰপেটাৰ জিলা উপায়ুক্ত মুনীন্দ্ৰ শৰ্মাই এক সংবাদমেলৰ আয়োজন কৰে ৷

জিলা উপায়ুক্তৰ কাৰ্যালয়ৰ সভাকক্ষত সন্ধিয়া ৬ বাজি ৩০ মিনিটত অনুষ্ঠিত সংবাদমেলত উপায়ুক্ত মুনীন্দ্ৰ শৰ্মাই উল্লেখ কৰে যে, বৰপেটা নিৰ্বাচনী জিলাৰ ৬ টা সমষ্টিত মুঠ ৬১ গৰাকী প্ৰাৰ্থীৰ মনোনয়ন পত্ৰ বৈধ হৈছে ৷

বৰপেটা সমষ্টিত ৬ গৰাকী, সৰভোগত ১০ গৰাকী, জনীয়াত ১২ গৰাকী, বাঘবৰত ১০ গৰাকী, সৰুক্ষেত্ৰীত ১২ গৰাকী আৰু চেঙাত ১১ গৰাকী প্ৰাৰ্থীৰ মনোনয়ন পত্ৰ বৈধ প্ৰমাণিত হোৱা বুলি উপায়ুক্ত গৰাকীয়ে উল্লেখ কৰে ৷

তেওঁ কয় যে, বৰপেটা নিৰ্বাচনী জিলাত এইবাৰ ৮০ উৰ্ধৰ ব্যক্তিৰ ১৫৩৪ গৰাকী ব্যক্তিয়ে আৰু ১০৮ গৰাকী বিশেষভাবে সক্ষম ব্যক্তিয়ে ঘৰত ভোটদান কৰাৰ বাবে আবেদন কৰিছে ৷

সেই অনুসৰি তেওঁলোকক দুটা পৰ্যায়ত ভোটগ্ৰহণ কৰা হব ৷ প্ৰথম পৰ্যায়ত ২৪ মাৰ্চৰ পৰা ২৬ মাৰ্চলৈ আৰু দ্বিতীয় পৰ্যায়ত ৩১ মাৰ্চৰ পৰা ২ এপ্ৰিললৈ আবেদন কৰা ৮০ বছৰ বয়সৰ উৰ্ধৰ ব্যক্তি আৰু বিশেষভাবে সক্ষম ব্যক্তি সকলৰ ঘৰে ঘৰে গৈ ভোটগ্ৰহণ কৰা হব ৷

অবৈধ ভাবে ধন সৰবৰাহ কৰাৰ ক্ষেত্ৰতো বৰপেটা জিলা প্ৰশাসন অধিক তৎপৰ হোৱা বুলি উল্লেখ কৰি বৰপেটা নিৰ্বাচনী জিলাত মুঠ ১,০৫,৯৯,৮৬৮ টকা জব্দ কৰা হৈছে বুলি উপায়ুক্ত গৰাকীয়ে উল্লেখ কৰে ৷

সংবাদ মেলত জিলা পৰিষদৰ মুখ্য কাৰ্যবাহী বিষয়া মনোজ কুমাৰ ছিকাৰীয়া, জিলা উন্নয়ন আয়ুক্ত দিগন্ত দাস, অতিৰিক্ত উপায়ুক্ত ক্ৰমে নৱজিৎ পাঠক, দুলাল দেৱনাথ, সব্যসাচী কাশ্যপ, কৰ্মদেৱ ব্ৰহ্ম, দিলীপ কুমাৰ বোথ্ৰা, জিলা তথ্য আৰু জনসংযোগ বিষয়া বিকাশ শৰ্মা আৰু নিৰ্বাচনী বিষয়া সুশীল কুমাৰ ডেকাও উপস্থিত থাকে ৷