আন এক অভিলেখ গঢ়িলে বিৰাট কোহলীয়ে, অতিক্ৰম কৰিলে ৰিকী পণ্টিঙক

আন এক অভিলেখৰ গৰাকী হ’ল টীম ইণ্ডিয়াৰ অধিনায়ক বিৰাট কোহলী।

পুনেত ইংলেণ্ডৰ বিৰুদ্ধে আজি অনুষ্ঠিত তিনিখনিয়া শৃংখলাৰ প্ৰথমখন এদিনীয়াত তেওঁ ৫৬ ৰাণৰ এক সুন্দৰ ইনিংছ উপহাৰ দিয়ে।

এই ইনিংছটোৰে তেওঁ ঘৰুৱা মাটিত আন্তঃৰাষ্ট্ৰীয় এদিনীয়া, টেষ্ট আৰু টি-২০ত দ্ৰুতগতিত ১০,০০০ ৰাণ সংগ্ৰহ কৰাৰ অভিলেখ স্থাপন কৰিছে।

ইয়াৰ পূৰ্বে এই অভিলেখ আছিল অষ্ট্ৰেলিয়াৰ প্ৰাক্তন অধিনায়ক ৰিকী পণ্টিঙৰ হাতত।

কোহলীয়ে অৰ্ধ শতক অৰ্জন কৰাৰ লগে লগে এই অভিলেখত উপনীত হয়।

ঘৰুৱা মাটিত বৰ্তমানলৈকে তেওঁ ৬১.৭৪ এভাৰেজ ৰাণসহ ১৯৫টা ইনিংছত ১০০০২ ৰাণ সংগ্ৰহ কৰিছে।

আনহাতে পণ্টিঙে এই অভিলেখ স্থাপনৰ বাবে খেলিব লগা হৈছিল ২১৯ টা ইনিংছ।

বৰ্তমান, এই অভিলেখৰ তালিকাত কোহলী আৰু পণ্টিঙৰ পাছতে আছে শচীন টেণ্ডুলকাৰ।

টেণ্ডুলকাৰে ২২৩টা ইনিংছত এই ৰাণ সংগ্ৰহ কৰিছিল।

ঘৰুৱা মাটিত ১০,০০০ ৰাণ সংগ্ৰহ কৰা আনকেইজন বেটছমেন হৈছে- শ্ৰীলংকাৰ মাহেলা জয়াবৰ্দেন, কুমাৰ ছাংগাক্কাৰা আৰু দক্ষিণ আফ্ৰিকাৰ জেকছ কালিছ।

আনহাতে, আজি অনুষ্ঠিত হোৱা মেচখনত ইংলেণ্ডে টছত জিকি বলিং কৰিবলৈ সিদ্ধান্ত গ্ৰহণ কৰে।

ভাৰতে প্ৰথম ইনিংছত পাঁচ উইকেটত ৩১৭ ৰাণ সংগ্ৰহ কৰি সন্মানজনক স্থানত উপনীত হয়।

অপেনাৰ শিখৰ ধাৱান (৯৮), অধিনায়ক কোহলী (৫৬), কে এল ৰাহুল (৬২) আৰু এদিনীয়া অভিষেক ঘটোৱা ক্ৰুণাল পাণ্ডিয়াই (৫৮) বেটিং বিক্ৰম প্ৰদৰ্শন কৰে।

উল্লেখযোগ্য যে মাত্ৰ ২৬টা বলতে অৰ্ধশতক অৰ্জন কৰি পাণ্ডিয়াই অভিষেক মেচত আটাইতকৈ দ্ৰুতগতিত অৰ্ধশতক কৰা বেটছমেন হিচাপে পৰিগণিত হৈছে।

ইংলেণ্ডৰ হৈ বেন ষ্টকছে ৩টা আৰু মাৰ্ক উডে ২টাকৈ উইকেট লাভ কৰে।

বাতৰি লিখাৰ পৰলৈকে, ইংলেণ্ডে ৩১৮ ৰাণৰ লক্ষ্য আগত লৈ ২৫ অভাৰত পাঁচটা উইকেট হেৰুৱাই ১৭৬ ৰাণ সংগ্ৰহ কৰিছে।

ইংলেণ্ডৰ এই সৱল স্থিতিৰ মূলতে হ’ল জনী ব’ৰিষ্ট’ৰ ৬৬টা বলত ৯৪ ৰাণৰ এক দুৰ্দান্ত ইনিংছ।

আনহাতে, ভাৰতৰ হৈ শ্বাৰদুল ঠাকুৰে ৩টা আৰু কেৰিয়াৰৰ প্ৰথমখন আন্তঃৰাষ্ট্ৰীয় এদিনীয়া মেচ খেলা প্ৰসিদ্ধ কৃষ্ণই ২টাকৈ উইকেট লাভ কৰিছে।