কৰোণাভাইৰাছক কুম্ভমেলাৰ ‘প্ৰসাদ’ হিচাপে অভিহিত কৰিলে মুম্বাইৰ মেয়ৰে, কিয়?

কুম্ভ মেলাৰ পৰা নিজ ৰাজ্যলৈ উভটি অহা ভক্তসকলে ‘প্ৰসাদ’ হিচাপে ক’ভিড বিয়পাব।

এই ভাষ্য আগবঢ়াইছে মুম্বাইৰ মেয়ৰ কিশোৰী পাডনেকাৰে।

শনিবাৰে মেয়ৰগৰাকীয়ে কয় যে মুম্বাইৰ পৰা হৰিদ্বাৰৰ কুম্ভমেলালৈ যোৱা ভক্তসকলে নিজ চহৰলৈ উভটি আহি কোৱাৰেণ্টাইনত থাকিব লাগিব, যাতে চহৰখনত ভাইৰাছটো বিয়পাব পাৰে।

উল্লেখযোগ্য যে মুম্বাই বৰ্তমান ক’ভিড-১৯ৰ স’তে যুঁজি আছে।

এক সংবাদ প্ৰতিষ্ঠানক তেওঁ কয় যে কুম্ভমেলালৈ কোন কোন গৈছে আৰু কোন কোন উভটি আহিছে, ব্যক্তিগতভাৱে তেওঁ নাজানে, কিন্তু কুম্ভমেলাৰ পৰা উভটি আহি ভক্তসকলে নিজ নিজ ৰাজ্যত ভাইৰাছবিধ ‘প্ৰসাদ’ৰ দৰে বিয়পাব।

এইক্ষেত্ৰত তেওঁ কুম্ভমেলাক যোৱা বৰ্ষৰ মাৰ্চ মাহৰ দিল্লীৰ তবলিগী জামাত কাণ্ডৰ স’তে তুলনা কৰে।

উল্লেখযোগ্য যে বিভাগীয় সূত্ৰই প্ৰকাশ কৰামতে, কুম্ভ মেলাৰ ফলত যোৱা পাঁচ দিনত হৰিদ্বাৰত ২১৬৭ জন লোকৰ ক’ভিড পজিটিভ পোৱা গৈছে।

ইয়াৰ ভিতৰত ২৮ জন সাধু আৰু তিনিজন ‘অখণ্ড’ও আছে।

যাৰ ফলত ৩০ এপ্ৰিললৈকে হ’ব লগা কুম্ভমেলা পাঁচদিনতে সমাপ্ত কৰা হৈছে।

মুম্বাইৰ মেয়ৰগৰাকীয়ে এই পদক্ষেপক আদৰণী জনাইছে।

তেওঁ কয় যে মানুহে ধৰ্মীয় বিশ্বাস পালন কৰাতো প্ৰয়োজনীয় কিন্তু বৰ্তমানৰ সময় হৈছে শক্তি আহৰণৰ।

তদুপৰি তেওঁ কয় যে কৰোণাভাইৰাচে বিধ্বংসী ৰূপ লোৱা মুম্বাইত এটা সম্পূৰ্ণ লকডাউন বলৱৎ কৰা প্ৰয়োজন।