কোভিডত আক্ৰান্ত হৈ সদৌ অসম কৰ্মচাৰী পৰিষদৰ সম্পাদক প্ৰধান মৃণাল দাসৰ বিয়োগ

কোভিডত আক্রান্ত হৈ সদৌ অসম কৰ্মচাৰী পৰিষদৰ সম্পাদক প্ৰধান মৃণাল দাসৰ  আজি ৰাতিপুৱা বিয়োগ ঘটিছে।

কোভিড-১৯ আক্ৰান্ত হৈ কেইদিনমান পূৰ্বে সদৌ অসম কৰ্মচাৰী পৰিষদৰ সম্পাদক প্ৰধান মৃণাল দাস যোৱা ৯ মে’ৰ পৰা গুৱাহাটী মেডিকেল কলেজ হাস্পাতালত চিকিৎসাধীন হৈ আছিল।

দাসক সংকটজনক অৱস্থাত অক্সিজেন ছাপোৰ্টত ৰখা হৈছিল।

ইয়াৰ পূৰ্বে দাসক মহানগৰীৰ এখন ব্যক্তিগত হাস্পাতালত ভৰ্তি কৰা হৈছিল যদিও স্বাস্থ্যৰ অৱনতি ঘটাত তেওঁক জিএমচিএইচলৈ স্থানান্তৰ কৰা হৈছিল।

সদৌ অসম কৰ্মচাৰী পৰিষদৰ সম্পাদক প্ৰধান মৃণাল দাসৰ বিয়োগত মুখ্যমন্ত্ৰী ড0 হিমন্ত বিশ্ব শৰ্মাই গভীৰ শোক প্ৰকাশ কৰিছে।

মুখ্যমন্ত্ৰীগৰাকীয়ে প্ৰয়াত দাসৰ বিদেহ আত্মাৰ সদগতি কামনা কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে।

সদৌ অসম কৰ্মচাৰী পৰিষদৰ সম্পাদক প্ৰধান মৃণাল দাসৰ বিয়োগত মাননীয় মুখ্যমন্ত্ৰী @himantabiswa ই গভীৰ শোক প্ৰকাশ কৰিছে। মুখ্যমন্ত্ৰীয়ে প্ৰয়াত দাসৰ বিদেহ আত্মাৰ সদগতি কামনা কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে। pic.twitter.com/IC9knHSYDh

— Chief Minister Assam (@CMOfficeAssam) May 15, 2021

আনহাতে, দাসৰ মৃত্যুত গভীৰ শোক প্ৰকাশ কৰিছে বিভিন্ন দল-সংগঠনে।

এক প্ৰেছ বিবৃতিযোগে অসম সচিবালয় সেৱা সন্থাৰ সাধাৰণ সম্পাদক, সদৌ অসম কৰ্মচাৰী পৰিষদৰ যুটীয়া সম্পাদক পাৰ্থ হাজৰিকাই প্ৰয়াত দাসৰ আত্মাৰ চিৰশান্তি কামনা কৰাৰ লগতে পৰিয়ালবৰ্গলৈ সমবেদনা জ্ঞাপন কৰিছে।