আপোনাৰ ভৰি চুম, কিন্তু ‘লেতেৰা খেল’ বন্ধ কৰক’’-প্ৰধানমন্ত্ৰীলৈ মমতাৰ শক্তিশেল!

‘’আপোনাৰ ভৰি চুম, কিন্তু ‘লেতেৰা খেল’ বন্ধ কৰক’’-এইদৰেই শনিবাৰে মমতাই উভতি ধৰিলে প্ৰধানমন্ত্ৰী নৰেন্দ্ৰ মোদীক।

মমতা বেনার্জীয়ে ৰাজ্যখনৰ মুখ্য সচিব আলাপন বেনাৰ্জীৰ বদলিৰ প্ৰসংগ দাঙি ধৰি বিজেপিয়ে বিধানসভাৰ নিৰ্বাচনত পৰাজিত হোৱাৰ পাছত বংগ বিৰোধী ৰাজনীতি কৰাৰ অভিযোগ উত্থাপন কৰে।

উল্লেখ্য যে শুকুৰবাৰে পশ্চিম বংগৰ মুখ্যমন্ত্ৰী মমতা বেনাৰ্জীয়ে প্ৰধানমন্ত্ৰী নৰেন্দ্ৰ মোদীৰ সৈতে য়ছ ঘূৰ্ণীবতাহক লৈ অনুষ্ঠিত পৰ্যালোচনা বৈঠক বৰ্জন কৰিছিল।

মমতাৰ বৈঠক বৰ্জনৰ পাছত দেশজুৰি প্ৰতিক্ৰিয়াৰ সৃষ্টি হয়। বিজেপিয়ে মমতাৰ এই পদক্ষেপক চোকা সমালোচনা কৰে।

মমতাই এনে প্ৰতিক্ৰিয়াৰ পাছত শনিবাৰে কয়,”মোৰ ৰাজ্যৰ জনসাধাৰণৰ কল্যাণৰ বাবে মই প্ৰধানমন্ত্ৰীৰ ভৰিও চুব পাৰো, কিন্তু ‘লেতেৰা খেল’ বন্ধ কৰিব লাগিব।”

মমতা বেনাৰ্জীয়ে জানিবলৈ দিয়ে যে প্ৰধানমন্ত্ৰী আৰু মুখ্যমন্ত্ৰীৰ উক্ত বৈঠকত বিজেপি নেতা আৰু ৰাজ্যপালক আমন্ত্ৰণ কৰাৰ বাবেই তেওঁ ক্ষুব্ধ হৈ ক্ষোভ উজাৰিছিল।

মমতা বেনাৰ্জীয়ে আনকি বৈঠকলৈ অহা পশ্চিমবংগৰ ৰাজ্যপালকে ধৰি বিজেপি নেতাকেইগৰাকীক প্ৰায় আধা ঘণ্টাৰো অধিক সময় অপেক্ষা কৰাই ৰাখিছিল।

মুখ্যমন্ত্ৰী মমতা বেনাৰ্জীয়ে কোঠাত প্ৰবেশ কৰি মাত্ৰ কেইমিনিটমান থকাৰ পাছতে প্ৰধানমন্ত্ৰীক ক্ষয়-ক্ষতিৰ নথি-পত্ৰসমূহ দি ওলাই গৈছিল। ঘূৰ্ণীবতাহৰ ফলত হোৱা ক্ষয়-ক্ষতিৰ ডিজিটেল উপস্থাপনৰ কাম কৰাতো মমতা বেনাৰ্জীয়ে বাধা দিয়াৰ অভিযোগ উঠিছে।

দৰাচলতে নন্দীগ্ৰামত মমতা বেনাৰ্জীক পৰাস্ত কৰা বিজেপি নেতা  তথা ৰাজ্যখনৰ বিৰোধী দলপতি শুভেন্দু অধিকাৰীকো উক্ত বৈঠকলৈ আমন্ত্ৰণ কৰাৰ বাবেই মুখ্যমন্ত্ৰীগৰাকী এইদৰে ক্ষুব্ধ হৈ পৰা বুলি কোৱা হৈছে।