আহিছে বান: মোকাবিলাৰ বাবে কাজিৰঙাত কিদৰে সাজু হৈছে বন বিভাগৰ কৰ্মী?

কাজিৰঙা ৰাষ্ট্ৰীয় উদ্যানৰ কলিয়াবৰ মহকুমাৰ অন্তৰ্গত বুঢ়াপাহাৰ বনাঞ্চলত সাম্ভাব্য বান পৰিস্থিতিৰ সৈতে মোকাবিলা কৰিবৰ বাবে সাজু বুঢ়াপাহাৰ বনাঞ্চলৰ বনকৰ্মী।

কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলত ইতিমধ্যে সাজু কৰি তুলিছে ৩০ খন হাত নাওঁ , ৩ খনকৈ মেচিন নাওঁ আৰু ৩ টা ফ্লটিং কেম্পৰ লগতে পৃথকে পৃথকে নিয়োগ কৰিছে বনকৰ্মীৰ দল ।

ইয়াৰোপৰি এই বুঢ়াপাহাৰ ৰেঞ্জত ৮ টাকৈ হাইলেণ্ড আছে, য’ত বানপানীৰ সময়ত জীৱকূল সমূহে আশ্ৰয় গ্ৰহণ কৰিব পাৰিব।

আনহাতে গঁড় সুৰক্ষা বাহিনীৰ দল অত্যাধুনিক মাৰণাস্ত্ৰৰে বানপানীৰ সময়ত গঁড় সুৰক্ষা দিবৰ বাবে সাজু হৈ আছে ।

বুঢ়াপাহাৰ বনাঞ্চলৰ ৩১ টা বন শিবিৰৰ ১০ টা বন শিবিৰত প্ৰত্যেক বাৰিষাতে ভয়ংকৰভাৱে বানে ক্ষতিগ্ৰস্ত কৰে।

বানপানীৰ সময়ত কলিয়াবৰ মহকুমাৰ অন্তৰ্গত বুঢ়াপাহাৰ বনাঞ্চলৰ পৰা বন্য জীৱ জন্তু ৩৭ নং ৰাষ্ট্ৰীয় ঘাইপথ অতিক্ৰম কৰি কাৰ্বি পাহাৰৰ দিশে যায়।

এনে সময়ত চোৰাং চিকাৰীৰ কৱলৰ পৰা জীৱ-জন্তু সমূহ ৰক্ষা কৰিবলৈ ২৪ ঘন্টাই এতিয়া সষ্টম হৈ পৰিছে বুঢ়াপাহাৰ বনাঞ্চলৰ বনকৰ্মীসকল।

লক্ষ্যণীয় যে বুঢ়াপাহাৰ বনাঞ্চল আৰু বাগৰি বনাঞ্চলত ইতিমধ্যে কলিয়াবৰ মহকুমা প্ৰশাসনে ১৪৪ ধাৰা জাৰি কৰিছে। সাম্ভাৱ্য বান পৰিস্থিতিত যাতে জীৱ-জন্তু দুস্কৃতিকাৰীৰ কৱলত নপৰে তাৰ বাবেই সষ্টম হৈ পৰিছে এতিয়া মহকুমা প্ৰশাসন।