মহানুভৱতা! শয্যাশায়ী ৰিতুমণিৰ সমস্ত চিকিৎসাৰ দায়িত্ব ল’লে সাংসদ তপন কুমাৰ গগৈয়ে

অৱশেষত উন্নত চিকিৎসা লাভ কৰিলে ৰিতুমণিয়ে। ২৪ বছৰীয়া যুৱতী ৰিতুমণিৰ সমস্ত চিকিৎসাৰ দায়িত্ব ল’লে সাংসদ তপন কুমাৰ গগৈয়ে।

দেওবাৰে সাংসদ গৰাকী ৰিতুমণিৰ হাঁহচৰাৰ মৈৰামাৰী বোকাপানী গাঁৱত উপস্থিত হৈ যুৱতীগৰাকীৰ স্বাস্থ্যৰ বুজ লয় আৰু ডিব্ৰুগড়ৰ ব্ৰহ্মপুত্ৰ চিকিৎসালয়ৰ চিকিৎসকৰ লগত কথা বতৰা পাতি এম্বুলেঞ্চৰ জড়িয়তে তৎক্ষাণিকভাৱে ব্ৰহ্মপুত্ৰ হস্পিতাললৈ প্ৰেৰণৰ ব্যৱস্থা কৰে।

সাংসদ গৰাকীয়ে লগতে পৰিয়ালৰ লোকক পঞ্চাশ হাজাৰ টকা প্ৰদান কৰে। সাংসদ গৰাকীয়ে অসুস্থ ৰিতুমণিৰ চিকিৎসাৰ সমস্ত খৰচ বহন কৰিব বুলি পৰিয়ালক জানিবলৈ দিয়ে।

উল্লেখ্য যে বিগত দুটা বছৰে ৰিতুমণিৰ শৰীৰত এটাৰ পিছত এটা অসুখে থিতাপি লোৱাত বৰ্তমান তেওঁ বিচনাতে শুই শুই জীৱন কটোৱাৰ লগতে বস্ত্ৰ পৰিধান কৰিব পৰা অৱস্থাতো নাই। সামান্য এখন কাপোৰেৰে লজ্জা নিবাৰণ কৰি অসহায়ভাৱে মাহৰ পিছত মাহ পৰি আছিল বিচনাত।

ৰিতুমণিৰ পিতৃ মাতৃ দৰিদ্ৰ হোৱাৰ বাবেই উপযুক্ত চিকিৎসা কৰিব নোৱাৰাত এইদৰে দুবছৰ ধৰি শয্যাগত হৈ আছে ৰিতুমণি।

ৰিতুমণিৰ অৱস্থা দেখি তেওঁৰ সহপাঠীয়ে সংবাদ মাধ্যম আৰু সামাজিক মাধ্যমৰ যোগেদি মুখ্যমন্ত্ৰী হিমন্ত বিশ্ব শৰ্মা আৰু স্বাস্থ্যমন্ত্ৰী কেশৱ মহন্তক পৰিয়ালটোক সহায় কৰিবলৈ অনুৰোধ জনাইছিল।

এই কথা যোৰহাট লোকসভাৰ সাংসদ তপন কুমাৰ গগৈয়ে জানিব পাৰি দেওবাৰে ৰিতুমণিৰ ঘৰত উপস্থিত হোৱাৰ লগতে তেওঁক উন্নত চিকিৎসাৰ ব্যৱস্থা কৰি দিয়ে।

সাংসদ গৰাকীয়ে তৎকালীনভাৱে লোৱা এই কাৰ্যক সকলোৱে প্ৰশংসা কৰাৰ লগতে ৰিতুমণিৰ সুস্বাস্থ্য কামনা কৰিছে।