সচিবালয়ৰ পৰাই প্ৰাক্তন মন্ত্ৰী তথা বিধায়ক ফণীভূষণ চৌধুৰীৰ গাড়ী চুৰিৰ ঘটনাই উদঙাইছে নিৰাপত্তাৰ প্ৰকৃত স্বৰূপ

বেজৰ নাকতে খৰ! হিমন্ত বিশ্ব শৰ্মা নেতৃত্বাধীন বিজেপি মিত্ৰজোঁটৰ চৰকাৰ খনে ৰাজ্যৰ আইন-শৃংখলা পৰিস্থিতিৰ সৈতে কোনো ধৰণৰ আপোচ কৰা নহ’ব বুলি মন্তব্য কৰি আহিছে।

খোদ মুখ্যমন্ত্ৰী হিমন্ত বিশ্ব শৰ্মায়ো আৰক্ষীৰ শেহতীয়া এনকাউণ্টাৰ পৰ্বকলৈ প্ৰচলিত আইনৰ দোহাই দি কোনো মন্ত্ৰী বিধায়ককে মাত নামাতিবলৈ সকিয়াই দিয়াৰ পিছতো ৰাজ্যৰ বিধানসভা চৌহদকে সুৰক্ষিত কৰিব পৰা নাই গৃহমন্ত্ৰীৰো দায়িত্বত থকা মুখ্যমন্ত্ৰীগৰাকীয়ে।

এইবাৰ আৰক্ষী-নিৰাপত্তাৰক্ষীয়ে দুৰ্ভেদ্য বেহুত পৰিণত কৰা খোদ বিধানসভাৰ চৌহদৰ পৰাই গাড়ী চোৰে প্ৰাক্তন মন্ত্ৰী তথা বৰ্তমানৰ বিধায়ক ফণীভূষণ চৌধুৰীৰ গাড়ীয়েই চোৰে লৈ উধাও হোৱাৰ খবৰ সকলোৰে চকু থৰ লগাইছে।

বিধায়ক ফণীভূষণ চৌধুৰীৰ ইন’ভা গাড়ী খন সচিবালয়ৰ চৌহদৰ পৰাই চোৰে চুৰি কৰি নিয়ে। কিন্তু নুমলীগড়ত বিধায়কগৰাকীৰ চুৰি হোৱা গাড়ী খন দুৰ্ঘটনাগ্রস্ত হোৱাৰ পিছত পোহৰলৈ গাড়ী চুৰিৰ ঘটনাটো।

তাৎপৰ্যপূৰ্ণভাবে বিধায়কগৰাকীৰ গাড়ীখন তেওঁৰ গাড়ী চালকেই চুৰি কৰা বুলি অভিযোগ উঠিছে।

দিছপুৰ আৰক্ষীয়ে ঘটনা সন্দৰ্ভত তিনিওজন লোক ক্ৰমে হাৰেজ আলী, আৰিফুল আলী, ছফিকুল আহমেদক আটক কৰিছে। সচিবালয় চৌহদৰ পৰাই কিদৰে গাড়ী খন চোৰে লৈ উধাও হ’ব পাৰিছিল সেই বিষয়ত আৰক্ষীয়ে তদন্ত আৰম্ভ কৰিছে।

কিন্তু কথাটো হ’ল সচিবালয়ৰ ভিতৰত কাৰ গাড়ী সোমাইছে, কাৰ গাড়ী ওলাই গৈছে আদি তথ্য সমূহ সঠিক কৈ ৰখা নহয় নেকি? এনে পৰিস্থিতিত দুষ্ট চক্ৰই সচিবালয়ৰ নিৰাপত্তাৰ সুৰুঙা গ্ৰহণ কৰি ভয়াৱহ বিপদ ঘটাব পাৰে বুলি সচেতন মহলে আশংকা ব্যক্ত কৰিছে।