তালিবানৰ মোক্ষম আঘাত; আফগানিস্তানত মুকলি আকাশৰ তলত লাখ লাখ লোক!

আমেৰিকাৰ সেনা বাহিনী দেশখনৰ পৰা প্ৰত্যাহাৰ কৰাৰ পাছৰে পৰা আফগানিস্তানৰ পৰিস্থিতি ক্ৰমে নিয়ন্ত্ৰণহীন পৰিছে।

দেশখনত আফগানিস্তানৰ চৰকাৰী সেনা বাহিনী আৰু তালিবান বিদ্ৰোহীৰ মাজত তুমুল যুদ্ধ চলি আছে। তালিবানে ইতিমধ্যে দেশখনৰ ৩৪ খন প্ৰদেশৰ ৯খনৰ নিয়ন্ত্ৰণ নিজৰ হাতলৈ আনিছে।

ৰাষ্ট্ৰসংঘৰ তথ্য অনুসৰি, যোৱা মে’ মাহৰ পৰা আফগান সেনা আৰু তালিবানৰ মাজৰ সংঘৰ্ষৰ ফলত ৪লাখতকৈয়ো অধিক সাধাৰণ নাগৰিক গৃহহাৰা হৈ পৰিছে। তেওঁলোকক এতিয়া খাদ্য আৰু চিকিৎসাৰ প্ৰয়োজন হৈছে।

দেশখনৰ বহু নাগৰিকে আশ্ৰয় শিৱিৰত স্থান নাপাই শিশুসকলক লৈ মুকলি আকাশৰ তলতে বাস কৰিবলগীয়া হৈছে।

তালিবানৰ ক্ষমতা দখলতকৈয়ো দেশখনৰ বৃহৎ সংকটটো হৈছে গৃহহীন মানুহৰ তীব্ৰ চাপ।

পূৰ্বৰে পৰা পাকিস্তান, তুৰস্ক আৰু ইৰানৰ শিৱিৰসমূহত লাখ লাখ লোকে আশ্ৰয় লৈ আছে। এতিয়া আৰু এই দেশবোৰে নতুনকৈ কোনো শৰণাৰ্থীক আশ্ৰয় নিদিয়ে। ফলত লাখ লাখ অসহায় লোকে নিজৰ দেশতে পৰিচয় হেৰুৱাই জীৱন কটাব লাগিব।

আনহাতে, প্ৰয়োজনৰ তুলনাত এক শতাংশও খাদ্য তথা দৰৱ যোগান পোৱা হোৱা নাই। ইউনিচেফে জানিবলৈ দিয়া মতে এই জৰুৰী পৰিস্থিতিত দেশখনৰ সংঘাতপূৰ্ণ অঞ্চলৰ প্ৰায় ৮০লাখ লোকক মানৱীয় সহায়ৰ প্ৰয়োজন।

ইপিনে, এখনৰ পাছত আনখন চহৰ তালিবানৰ দখললৈ যোৱাৰ বাবে এই সংকট দীৰ্ঘকালীন হোৱাৰ সম্ভাৱনা দেখা গৈছে।