বঙাইগাঁও জিলা সাহিত্য সভা আৰু বৃহত্তৰ বঙাইগাঁও প্ৰেছ ক্লাবৰ উদ্যোগত সুধাকণ্ঠ ড° ভূপেন হাজৰিকাৰ স্মৃতি দিৱস পালন

বঙাইগাঁও জিলা সাহিত্য সভাৰ উদ‍্যোগত আৰু বৃহত্তৰ বঙাইগাঁও প্ৰেছ ক্লাবৰ সৌজন্যত আজি প্ৰেছ ক্লাবত সুধাকণ্ঠ ড° ভূপেন হাজৰিকাৰ দশম সংখ্যক স্মৃতি দিৱস পালন কৰা হয় ৷

স্মৃতি দিৱসৰ লগত সংগতি ৰাখি চাৰিখন গ্ৰন্থও উন্মোচন কৰা হয় ৷

এই উপলক্ষে জিলা সাহিত্য সভাৰ প্ৰাক্তন সম্পাদক অৰূপ পাঠকে আঁত ধৰা স্মৃতিচাৰণ আৰু গ্ৰন্থ উন্মোচনী সভাত সভাপতিত্ব কৰে জিলা সাহিত্য সভাৰ সভাপতি ৰমলা ৰায় সৰকাৰে ৷

সভাৰ আৰম্ভণিতে প্ৰেছ ক্লাবৰ সভাপতি ৰঞ্জিত কুমাৰ শৰ্মাই সুধাকণ্ঠৰ প্ৰতিচ্ছবিত মাল্যাৰ্পন আৰু বন্তি প্ৰজ্বলন কৰি শ্ৰদ্ধাঞ্জলি অনুষ্ঠান মুকলি কৰে ৷

ইয়াৰ পিছতে উপস্থিত সকলোৱে সুধাকণ্ঠৰ ‘ মানুহে মানুহৰ বাবে ‘ শীৰ্ষক কালজয়ী গীতটি পৰিৱেশন কৰে ৷

প্ৰেছ ক্লাবৰ সাধাৰণ সম্পাদক প্ৰণৱ কুমাৰ ডেকাই উদ্দেশ্য ব্যাখ্যা কৰা অনুষ্ঠানত বীৰঝৰা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ তথা কবি,সাহিত্যিক গণেশ্বৰ দেৱ শৰ্মাই মুখ্য অতিথি হিচাপে উপস্থিত থাকি ভাৰতৰত্ন ড° ভূপেন হাজৰিকাৰ জীৱনৰ বিভিন্ন দিশ সামৰি বক্তব্য ৰাখে ৷

উল্লেখ্য যে এই অনুষ্ঠানতে কবি ৰাণী দেৱীৰ চাৰিখনকৈ গ্ৰন্থ উন্মোচন কৰা হয় ৷ ইয়াৰ ভিতৰত ‘ৰ’দ হৈ আহিবা ‘ শীৰ্ষক কাব্য গ্ৰন্থখন বৃহত্তৰ বঙাইগাঁও প্ৰেছ ক্লাবৰ সভাপতি ৰঞ্জিত কুমাৰ শৰ্মাই উন্মোচন কৰাৰ বিপৰীতে ‘সুবাসিত অনুৰাগৰ ঢৌ’ শীৰ্ষক কাব্য গ্ৰন্থখন অসম গ্ৰামীণ বিকাশ বেংকৰ অৱসৰপ্ৰাপ্ত প্ৰৱন্ধক বলোৰাম ৰায়ে উন্মোচন কৰে ৷

আনহাতে সৰু সৰু স্তাৱকবোৰক একত্ৰিত কৰি প্ৰকাশ কৰা ‘সুবাসিত তৃষ্ণা ‘গ্ৰন্থখন উন্মোচন কৰে বঙাইগাঁও জিলা সাহিত্য সভাৰ সভাপতি ৰমলা ৰায় সৰকাৰে ৷

সেইদৰে অসম সাহিত্য সভাৰ ৰাজ্যিক কাৰ্যনিৰ্বাহক সদস্য কামাখ্যা প্ৰসাদ ৰায়ে ‘জেতুকাবুলীয়া সপোন ‘শীৰ্ষক শ্বেয়েৰী সংকলনখন উন্মোচন কৰে ৷ অনুষ্ঠানত শিল্পী হেৰম্ব অধিকাৰীৰ লগতে যুতিকা ৰায় আৰু প্ৰবীণ বৈশ্যই গীত পৰিৱেশন কৰি অনুষ্ঠানটিক অধিক মনোগ্ৰাহী কৰি তোলে । অনুষ্ঠানত জিলা সাহিত্য সভাৰ উপ সভাপতি বিক্ৰম মেধিকে ধৰি বিভিন্নজন ব্যক্তি উপস্থিত থাকে ৷ শলাগৰ শৰাই আগবঢ়ায় জিলা সাহিত্য সভাৰ প্ৰাক্তন সম্পাদক অৰূপ পাঠকে ৷

ল’ৱাৰ আসাম চাউণ্ড এছোচিয়েচন আৰু বঙাইগাঁও জিলা শিল্পী সমাজৰ উদ্যোগতো আজি সুধাকণ্ঠ ড° ভূপেন হাজৰিকাৰ দশম বাৰ্ষিক মৃত্যু দিৱস উদযাপন কৰা হয় ৷

বঙাইগাঁৱৰ পুৰণি বঙাইগাঁও নিয়তি সংঘত উদযাপন কৰা দিৱসৰ কাৰ্যসূচীৰ আৰম্ভণিতে ল’ৱাৰ আসাম চাউণ্ড এছোচিয়েচন আৰু বঙাইগাঁও জিলা শিল্পী সমাজৰ পতাকা উত্তোলন কৰে ক্ৰমে সম্পাদক অবীন নাথ আৰু ভাৰপ্ৰাপ্ত সভাপতি নন্দলাল বৰ্মনে ৷

সুধাকণ্ঠকৰ প্ৰতিচ্ছবিত বন্তি প্ৰজ্বলন কৰি শ্ৰদ্ধাঞ্জলি অনুষ্ঠানৰ মুকলি কৰে অৱসৰপ্ৰাপ্ত আৰক্ষী বিষয়া তথা বিশিষ্ট সাহিত্যিক হৰিধন ডেকাই ৷

আনহাতে সুধাকণ্ঠৰ ‘মানুহে মানুহৰ বাবে ‘কালজয়ী গীতটি পৰিৱেশন কৰে শিল্পী সমাজৰ শিল্পীসকলে ৷ উল্লেখ্য যে সুধাকণ্ঠৰ মৃত্যু দিৱসৰ কাৰ্যসূচীৰ লগত সংগতি ৰাখি শিল্পী সমাজৰ শিল্পীসকলে সুধাকণ্ঠৰ গীত – মাত পৰিৱেশন কৰে ৷