“ডাইৰেক্ট মাৰিছে”— নাগালেণ্ড আছাম ৰাইফলছৰ গণহত্যাত প্ৰাণ ৰক্ষা পৰা এজন যুৱকে ক’লে নৃশংস আক্ৰমণৰ কথা

“ডাইৰেক্ট মাৰিছে…। তেওঁলোকে আমাক সোঁফালে গুলী চালনা কৰিছিল।”—শনিবাৰে সন্ধিয়া নাগালেণ্ডৰ মন জিলাৰ অটিং গাঁৱত আছাম ৰাইফলছৰ আক্ৰমণৰ পৰা কথমপি প্ৰাণ ৰক্ষা পৰা ২৩ বছৰীয়া শ্বেইৱাঙে সদৰী কৰিছে এই নৃশংস বৰ্বৰ হত্যাকাণ্ডৰ কথা।

কিলাকুটি আৰু বুকুত গুলীৰ আঘাতৰ পিছত ডিব্ৰুগড়ৰ অসম চিকিৎসা মহাবিদ্যালয় জীৱনৰ সৈতে যুঁজ দি আছে শ্বেইৱাঙ নামৰ যুৱকজন।

আক্ৰমণত প্ৰাণ ৰক্ষা পৰা আন এজন আঘাতপ্ৰাপ্ত শ্ৰমিক য়েহুৱাঙো ডিব্ৰুগড় চিকিৎসা মহাবিদ্যালয়ত চিকিৎসাধীন হৈ আছে। কাণৰ ওচৰত গুলী লগা য়েহুৱাঙে বৰ্তমান পৰ্যন্ত মাত মাতিব পৰা অৱস্থাত নাই। মঙ্গলবাৰে সন্ধিয়া তেওঁৰ এটা জৰুৰী অক্টোপচাৰ কৰা হয়।

উল্লেখ্য যে কেন্দ্ৰীয় গৃহ মন্ত্ৰী অমিত শ্বাহে সোমবাৰে ৰাজ্যসভাত এক বিবৃতিত উল্লেখ কৰিছিল যে বাহনখনক ৰ’বলৈ ইংগিত দিয়া হৈছিল আৰু পলাই যাবলৈ চেষ্টা কৰাৰ পিছত গুলীচালনা কৰা হৈছিল।

কিন্তু শ্বেইৱাঙৰ ভাষ্যত অমিত শ্বাহৰ মিথ্যাচাৰিতা ফাদিল হৈছে। শ্বেইৱাঙে কয়, “আমাক ৰ’বলৈ ইংগিত দিয়া হোৱা নাছিল। তেওঁলোকে আমাক পোনপটীয়াকৈ হত্যা কৰিছিল। আমি পলাই যাবলৈ চেষ্টা কৰা নাছিলো। আমি কেৱল বাহনখনত আছিলো।”

ঘটনাটোৰ বিষয়ে উল্লেখ কৰি শ্বেইৱাঙে কয় যে যোৱা শনিবাৰে কয়লা খনিত কাম শেষ কৰাৰ পিছত, তেওঁলোকৰ আঠজন পিক-আপ ট্ৰাকত ঘৰলৈ উভতি আহিছিল।

“হঠাতে, বাটত, আমাক গুলীচালনা কৰা হৈছিল। মোৰ মনত নাই যে ই কিমান সময় চলিছিল, কিন্তু কিছু সময়ৰ বাবে গুলীবৰ্ষণ অব্যাহত আছিল। এনেকুৱা লাগিছিল যেন বোমা বিস্ফোৰণ হৈ আছে। আনকি তেতিয়া আন্ধাৰো নাছিল, তথাপিও তেওঁলোকে আমাক গুলীয়াইছিল।” তেওঁ কয়।

গুলীবৰ্ষণ আৰম্ভ হোৱাৰ লগে লগে বাহনৰ ভিতৰত থকা শ্ৰমিক কেইজন বাহনখনৰ মজিয়াত বাগৰি পৰিছিল বুলি উল্লেখ কৰি তেওঁ কয়, “গুলীচালনাৰ মোক আন এখন বাহনলৈ লৈ যোৱা হৈছিল,” শ্বেইৱাঙে লগতে কয় যে তেওঁ তেওঁৰ ভায়েককে ধৰি আনসকলৰ মৃত্যুৰ বিষয়ে অৱগত আছিল।

সাংবাদিকে তেওঁলোকে কিবা অস্ত্ৰ কঢ়িয়াই নিছিল নেকি বুলি কৰা প্ৰশ্নৰ উত্তৰত তেওঁ কয়, “আমাৰ হাতত একো নাছিল। আমি খনিত কাম কৰিহে উভতি আহিছিলো।”

সমগ্ৰ আক্ৰমণৰ প্ৰত্যক্ষদৰ্শী তথা ভুক্তভোগী শ শ্বেইৱাঙৰ এই মন্তব্যৰ পাছত স্পষ্টকৈ প্ৰমাণিত হৈছে আছাম ৰাইফলছৰ নৃশংসতা আৰু কেন্দ্ৰীয় গৃহ মন্ত্ৰী অমিত শ্বাহৰ মিথ্যাচাৰিতা।

কোনো দোষ নোহোৱাকৈয়ে ১৫ জনকৈ সাধাৰণ নিৰীহ জনতাৰ মৃত্যু পৰ্যন্ত হোৱাৰ পিছতো গৃহমন্ত্ৰীৰ মিথ্যাচাৰিতাই প্ৰকৃততে কি প্ৰকাশ কৰে! গণহত্যাত জড়িত সেনা বাহিনীক ৰক্ষাকৰ্তাৰ ৰূপতহে অৱতীৰ্ণ হৈছে গৃহমন্ত্ৰী অমিত শ্বাহ।