আজি মুকলি হ’ব পিএম- কিষাণ নিধি আঁচনিৰ দশম কিস্তিৰ ধনৰাশি

নৱবৰ্ষৰ প্ৰথম দিনাই প্ৰধানমন্ত্ৰী নৰেন্দ্ৰ মোদীয়ে প্ৰধানমন্ত্ৰী কৃষক সন্মান নিধি (পিএম-কিষাণ) আঁচনিৰ অধীনত বিত্তীয় লাভালাভৰ দশম কিস্তি মুকলি কৰিব।

প্ৰধানমন্ত্ৰীৰ কাৰ্যালয়ৰ এক চৰকাৰী বিবৃতি অনুসৰি ১০ কোটিতকৈও অধিক হিতাধিকাৰী কৃষক পৰিয়াললৈ ২০,০০০ কোটি টকাতকৈও অধিক ধনৰাশি প্ৰদান কৰা হ’ব।

বিবৃতিটোত লগতে কোৱা হৈছে যে চৰকাৰৰ নিৰন্তৰ প্ৰতিশ্ৰুতি আৰু তৃণমূল পৰ্যায়ৰ কৃষকসকলক শক্তিশালী কৰাৰ সংকল্পক বাস্তৱায়িত কৰিবলৈ এই পদক্ষেপ লোৱা হৈছে।

উল্লেখ্য যে, আঁচনিখনৰ অধীনত যোগ্য কৃষকসকলক প্ৰতি বছৰে ৬০০০ টকাৰ বিত্তীয় সাহাৰ্য্য প্ৰদান কৰা হয়। এই পুঁজি হিতাধিকাৰীসকলৰ বেংক একাউণ্টত পোনপটীয়াকৈ প্ৰদান কৰা হয়।

সংবাদ সংস্থা ANI ৰ মতে, এই আঁচনিৰ অধীনত বৰ্তমানলৈকে ১.৬ লাখ কোটিতকৈও অধিক টকা কৃষক সকলক প্ৰদান কৰা হৈছে।