মোদীৰ পঞ্জাৱ ভ্ৰমণ: তদন্ত কমিটি গঠন পঞ্জাৱ চৰকাৰৰ, তিনি দিনৰ ভিতৰত দাখিল কৰিব প্ৰতিবেদন

বুধবাৰে প্ৰধানমন্ত্ৰী নৰেন্দ্ৰ মোদীৰ ফিৰোজপুৰ ভ্ৰমণৰ সময়ত নিৰাপত্তাৰ ত্ৰুটিৰ তদন্তৰ বাবে পঞ্জাৱ চৰকাৰে এটা উচ্চ পৰ্যায়ৰ দল গঠন কৰিছে।

পঞ্জাৱ আৰু হাৰিয়ানা উচ্চ ন্যায়ালয়ৰ ন্যায়াধীশ (অৱসৰগ্ৰস্ত) মেহতাব গিল আৰু গৃহ আৰু ন্যায় বিভাগৰ প্ৰধান সচিব অনুৰাগ বাৰ্মাক লৈ এই কমিটি গঠণ কৰা হৈছে।

এই কমিটিয়ে তিনি দিনৰ ভিতৰত এক প্ৰতিবেদন দাখিল কৰিব বুলি এজন চৰকাৰী মুখপাত্ৰই জনায়।

প্ৰধানমন্ত্ৰী নৰেন্দ্ৰ মোদীয়ে হুছেইনিৱালা সীমান্তৰ ৰাষ্ট্ৰীয় শ্বহীদ স্মাৰকলৈ যোৱাৰ সময়তে প্ৰতিবাদকাৰীসকলে পথ অৱৰোধ কৰাৰ পিছত ২০ মিনিটৰ বাবে পঞ্জাৱৰ এখন উৰণীয়া সেঁতোত আৱদ্ধ হৈ আছিল।

এনে অভাৱনীয় পৰিস্থিতিৰ সন্মুখীন হোৱাৰ পিছত প্ৰধানমন্ত্ৰী মোদীয়ে ফিৰোজপুৰত এক নিৰ্ধাৰিত কাৰ্যসূচী বাতিল কৰে।

ইয়াৰ পিছতে নিৰাপত্তা আসোঁৱাহৰ প্ৰতি গুৰুত্ব দি পঞ্জাৱ চৰকাৰৰ পৰা এক বিতং প্ৰতিবেদন বিচাৰিছিল আৰু পঞ্জাৱ চৰকাৰক এই ভুলৰ বাবে দায়বদ্ধতা নিৰ্ধাৰণ কৰিবলৈ আৰু কঠোৰ ব্যৱস্থা ল’বলৈ দাবী জনাইছিল।