অন্য এক মাইলষ্ট’ন স্পৰ্শ ভাৰতীয় ক্ৰিকেট দলৰ, সমুখত কেৱল পাকিস্তান

শুকুৰবাৰে নিশা কলকাতাৰ ইডেন গাৰ্ডেনত অনুষ্ঠিত দ্বিতীয়খন টি-২০ খেলত ভাৰতে ৱেষ্ট ইণ্ডিজক পৰাস্ত কৰি তিনিখন খেলৰ টি-২০ শৃংখলাত ২-০ ৰ অগ্ৰগতি লাভ কৰে।

এই বিজয়ৰ পাছত ভাৰতে ক্ৰিকেটৰ ইতিহাসত এক বিশেষ মাইলষ্ট’ন স্পৰ্শ কৰে। ক্ৰিকেট বিশ্বত এই কৃতিত্ব অৰ্জন কৰা কেৱল দ্বিতীয় দল হিচাপে পৰিগণিত হৈছে ভাৰত।

ৱেষ্ট ইণ্ডিজৰ বিৰুদ্ধে জয়ৰ লগে লগে ভাৰতে পুৰুষ ক্ৰিকেটত ১০০ খন টি-২০ মেচত জয়ৰ সাফল্য অৰ্জন কৰে।

ভাৰতে এতিয়ালৈকে মুঠ ১৫৫ খন টি-২০ মেচত ভাগ লৈছে। ইয়াৰে ১০০ খন খেলত জয় লাভ কৰাৰ বিপৰীতে ৫১ খনত পৰাস্ত হৈছে। অমীমাংসিত হৈছে ৪ খন খেল।

A special 💯 for #TeamIndia in T20Is 💥💥 pic.twitter.com/czrBSeRpR4

— BCCI (@BCCI) February 18, 2022

উল্লেখ্য যে এইক্ষেত্ৰত ভাৰততকৈ আগত আছে কেৱল চুবুৰীয়া ৰাষ্ট্ৰ পাকিস্তান। পাকিস্তানে ১৮৯ খন টি-২০ মেচ খেলিছে আৰু ১১৮ খনত বিজয় সাব্যস্ত কৰিছে।

অৱশ্যে জয়ৰ গড় হাৰৰ ক্ষেত্ৰত পাকিস্তানতকৈ (৬৪.৪ শতাংশ) আগত আছে ভাৰত (৬৫.২৩ শতাংশ)। অৱশ্যে এইক্ষেত্ৰত ৬৭.৯৭ শতাংশ জয়ৰ গড় হাৰে শীৰ্ষত আছে আফগানিস্তান।