দিদিৰ আশীৰ্বাদ লৈ অসমত উপস্থিত হৈয়ে ৰিপুন বৰাৰ দাবী: তৃণমূল হ’ব বিজেপিৰ বিকল্প

তৃণমূল কংগ্ৰেছত যোগদান কৰাৰ পাছত আজি পুৱা ১১:৩০ ত দিল্লীৰ পৰা গুৱাহাটী বিমান বন্দৰত উপস্থিত হয় অসম তৃণমূল কংগ্ৰেছৰ সভাপতি ৰিপুন বৰা৷

বিমান বন্দৰত ৰিপুন বৰাক তেওঁৰ সমৰ্থক সকলে বিপুল আদৰণি জনায়।

অসমত তৃণমূলৰ তেনে বিশেষ জনসমৰ্থন নথকাৰ সত্বেও যথেষ্ট সংখ্যক লোকে তেওঁক ঢোলে-দগৰে আদৰণি জনোৱাৰ লগতে এটা বাইক ৰেলীও উলিওৱা হয়।

বাইক ৰালীৰ পাছে পাছে পদযাত্ৰা কৰে সভাপতি ৰিপুন বৰাই।

তেওঁৰ সমাৰ্থক সকলক উদ্দেশ্যি সভাপতি ৰিপুন বৰাই কয় “মোৰ আৰু তৃণমূলৰ সমৰ্থক তথা কৰ্মীসকল বিভিন্ন প্ৰান্তৰ পৰা আহিছে আৰু তেখেতসকলৰ উৎসাহ দেখি মই আনন্দত অভিভূত হৈছো।”

“তৃণমূল কংগ্ৰেছৰ জনপ্ৰিয়তা অসমত বাঢ়িছে। ই অতিকৈ আনন্দৰ বিষয়। মোৰ বিশ্বাস অনাগত দিনত অসমৰ ৰাইজে অসম তৃণমূল কংগ্ৰেছক আঁকোৱালি ল’ব।”- বৰাই কয়।

ৰিপুন বৰাই লগতে অসম তৃণমূল কংগ্ৰেছ অনাগত দিনত অসমত এক মাত্ৰ শক্তিশালী বিৰোধী দল হোৱাৰ লগতে বিজেপিৰ বিকল্প হিচাপে পৰিগণিত হ’ব বুলিও দাবী কৰে।