দেশৰ সুৰক্ষাত সেৱা আগবঢ়াই সন্মানিত হ’ল পেট্ৰ’ন: কোন এই পেট্ৰ’ন!

তিনিমাহ ধৰি চলি থকা ৰাছিয়া-ইউক্ৰেইন যুদ্ধত শক্তিশালী ৰাছিয়াৰ বিৰুদ্ধে মৰণ-পন যুঁজ দিছে ইউক্ৰেইনে। দেশৰ সুৰক্ষাত বীৰদৰ্পে সেৱা আগবঢ়াই বোমা নিষ্ক্ৰিয় কৰা যুঁজাৰুসকলক সন্মান জনাইছে ইউক্ৰেইনৰ ৰাষ্ট্ৰপতি জেলেনস্কিয়ে।

এনে এজন যুঁজাৰু এতিয়া বিশেষভাৱে চৰ্চিত হৈছে। এই যুঁজাৰু জন অৱশ্যে মানুহ নহয়, এটা সৰু কুকুৰ। দেশৰ সুৰক্ষাত অৰিহণা যোগোৱা বাবে কুকুৰটোৱে ৰাষ্ট্ৰপতি ভলোডিমিৰ জেলেনস্কিৰ হাতৰ পৰা বঁটাও লাভ কৰিছে। আঢ়ৈ বছৰীয়া কুকুৰটোৰ নাম পেট্ৰ’ন।

ৰাছিয়াই আক্ৰমণ আৰম্ভ কৰাৰ পিছত পেট্ৰ’নে প্ৰায় ২০০ টা বিস্ফোৰক উদ্ধাৰ কৰিছে বুলি জানিব পৰা গৈছে। বগা খয়েৰী ৰঙৰ পেট্ৰ’ন ৰাছিয়াৰ বিৰুদ্ধে ইউক্ৰেইনৰ ৰক্তক্ষয়ী সংগ্ৰামৰ প্ৰতীক হৈ পৰিছে। পেট্ৰ’নৰ মালিকৰ নাম হৈছে মাইহেইলো ইলিভ।

ইলিভ ইউক্ৰেইনৰ সেনাবাহিনীত মেজৰ হিচাপে নিযুক্ত হৈ আছে। পেট্ৰ’নৰ লগতে মাইহেইলোকো পুৰস্কৃত কৰা হৈছে। দেওবাৰে অনুষ্ঠিত হোৱা পদক সমাৰোহত কানাডাৰ প্ৰধানমন্ত্ৰী জাষ্টিন ট্ৰুডোও উপস্থিত আছিল।

ছচিয়েল মিডিয়াত পোষ্ট কৰা ভিডিঅ’ত কানাডা আৰু ইউক্ৰেইনৰ ৰাষ্ট্ৰপ্ৰধানসকলক থিয় হৈ থকা দেখা গৈছে। সন্মানৰ বাবে নাম ঘোষণা কৰাৰ পিছত পেট্ৰ’ন মালিকৰ সৈতে আগবাঢ়ি আহিছে। পেট্ৰ’নে পদকটো লোৱাৰ আগতে নেজ লৰাই ধন্যবাদো দিছে।

Patron received his recognition. Among those who save the lives of 🇺🇦 every day are four-legged heroes. The most famous among them is Patron, a bomb-sniffing dog. In the presence of @JustinTrudeau, @ZelenskyyUa presented him an award “For Dedicated Work in the #UAarmy“. pic.twitter.com/mssSTlfIKW

— Defence of Ukraine (@DefenceU) May 9, 2022

এনে এক কঠিন সময়তো সেই দৃশ্য দেখি সকলোৰে মুখত হাঁহি বিৰিঙিছিল। জেলেনস্কিয়ে পেট্ৰ’নৰ অৱদানৰ বাবে কৃতজ্ঞতা জনাই মালিক মাইহেইলোক পদকটো হস্তান্তৰ কৰে।

অনুষ্ঠানটোৰ শেষত জেলেনস্কিয়ে কয়, “আমাৰ দেশত বোমা নিষ্ক্ৰিয় কৰা নায়কসকলক আজি সন্মানিত কৰা হৈছে। তেওঁলোকৰ লগত পেট্ৰ’ন নামৰ এটা সৰু কুকুৰো আছে।”