দিল্লী অগ্নিকাণ্ড: দণ্ডাধীশ তদন্তৰ নিৰ্দেশ মুখ্যমন্ত্ৰী কেজৰিৱালৰ, নিহতৰ পৰিয়াললৈ ১০ লাখ টকাৰ সাহায্য

দিল্লীৰ মুণ্ডকা ভৱনৰ ভয়াৱহ অগ্নিকাণ্ডত নিহত হোৱা মৃতকৰ পৰিয়াললৈ ১০ লাখ টকা আৰু অগ্নিকাণ্ডত আহত সকলৰ বাবে ৫০,০০০ টকাৰ ক্ষতিপূৰণ ঘোষণা কৰিছে দিল্লীৰ মুখ্যমন্ত্ৰী অৰবিন্দ কেজৰিৱালে।

মুখ্যমন্ত্ৰী কেজৰিৱাল আৰু উপ মুখ্যমন্ত্ৰী মনীষ চিছোদিয়াই ঘটনাস্থলীত উপস্থিত হৈ পৰিস্থিতিৰ বুজ লয়। এই ভয়াৱহ অগ্নিকাণ্ডৰ দণ্ডাধীশ পৰ্যায়ৰ তদন্তও ঘোষণা কৰে মুখ্যমন্ত্ৰীগৰাকীয়ে।

এই ভয়াৱহ অগ্নিকাণ্ডত ইতিমধ্যে ২৭ জন লোকৰ মৃত্যু হৈছে। আনহাতে এই ঘটনাত বৰ্তমানলৈকে ২৯ জন ব্যক্তি সন্ধানহীন হৈ আছে বুলি জানিব পৰা গৈছে।

স্থানীয় সঞ্জয় গান্ধী মেম’ৰিয়েল হাস্পতালৰ অসামৰিক প্ৰতিৰক্ষা দলে দিয়া এক বিবৃতিত এই তথ্য প্ৰকাশ পাইছে। সন্ধানহীন ব্যক্তিসকলৰ আত্মীয়সকলে হাস্পতালত এই সকল ব্যক্তিৰ সন্ধান চলোৱাৰ ওপৰত আধাৰ কৰি হাস্পতাল কৰ্তৃপক্ষই এই তথ্য প্ৰকাশ কৰিছে।

প্ৰতিবেদন অনুসৰি, বৰ্তমান কেৱল এজন আহত ব্যক্তিক চিকিৎসালয়খনত চিকিৎসাধীন হৈ আছে।

ঘটনাটোৰ পিছত মুঠ ১৪ জন আহত লোকক চিকিৎসালয়লৈ অনা হৈছিল যদিও ইতিমধ্যে ১৩ জনক অব্যাহতি দিয়া হৈছে বুলি প্ৰতিবেদনত উল্লেখ কৰা হৈছে।