এইবাৰ ‘অটল বিহাৰী বাজপেয়ীৰ জীৱনৰ আধাৰত বলীউডত নিৰ্মাণ হ’ব ছবি

বায়’পিক সদায় বলীউডৰ প্ৰিয় হৈ আহিছে। সেয়া কোনো ক্ৰীড়া ব্যক্তিত্বই হওক বা এজন অভিনেতাৰ জীৱনেই হওক। আনকি বলীউডে ৰাজনৈতিক ব্যক্তিত্বৰ জীৱনৰ আধাৰতো ছবি নিৰ্মাণ কৰিছে।

এইবাৰ তালিকাত স্থান লাভ কৰিছে ভাৰতৰ প্ৰাক্তন প্ৰধানমন্ত্ৰী অটল বিহাৰী বাজপেয়ীৰ বায়’পিক। প্ৰযোজক সন্দীপ সিঙে ছচিয়েল মিডিয়াত এটা মোচন পোষ্টাৰ শ্বেয়াৰ কৰি এই কথা ঘোষণা কৰে।

ছ’চিয়েল মিডিয়াত চিনেমাৰ মোচন পোষ্টাৰ শ্বেয়াৰ কৰি সন্দীপে লিখিছে, ‘অটল বিহাৰী বাজপেয়ী ভাৰতীয় ইতিহাসৰ অন্যতম শ্ৰেষ্ঠ নেতা। কেৱল তেওঁৰ ভাষণ শুনিয়েই বিৰোধী পৰাজিত হৈছিল। তেখেতে দেশক ইতিবাচক নেতৃত্ব দিছিল আৰু প্ৰগতিশীল ভাৰতৰ এখন মানচিত্ৰ তৈয়াৰ কৰিছিল।’

সন্দীপে আৰু লিখিছে, ‘অটল বিহাৰী বাজপেয়ীৰ জীৱনৰ অন্যান্য দিশবোৰো এই ছবিখনত আহিব। কেৱল ৰাজনীতি নহয়, তেওঁৰ কবিতা, লেখা আৰু তেওঁৰ মানৱীয় দিশো ছবিখনৰ কাহিনীত আহিব।‘চলচ্চিত্ৰখনৰ নাম’ অটল’। ছবিখনৰ পোষ্টাৰত লিখা আছে ‘মে ৰহু, য়া না ৰহু য়ে দেশ ৰেহেনা চাহিয়ে’।

এন পি মেনচাৰৰ ‘অনটল্ড বাজপেয়ী: পলিটিচিয়ান এণ্ড পেৰাডক্স’ নামৰ গ্ৰন্থখনৰ পৰা অনুপ্ৰাণিত হৈছে ছবিখনৰ মূল কাহিনী। বিনোদ ভানুশালী আৰু সন্দীপ সিঙ যৌথভাৱে ছবিখনৰ নিৰ্মাণৰ দায়িত্বত আছে। অটল বিহাৰী বাজপেয়ীৰ চৰিত্ৰত কোনে অভিনয় কৰিব আৰু কোনে পৰিচালনা কৰিব সেয়া স্পষ্ট হোৱা নাই।

জানিব পৰা মতে, ২০২৩ত বছৰৰ আৰম্ভণিতে এই ছবিখনৰ শ্বুটিং আৰম্ভ হ’ব। ২০২৩ চনৰ খ্ৰীষ্টমাছত অটল বিহাৰী বাজপেয়ীৰ ৯৯ সংখ্যক জন্ম জয়ন্তীত মুক্তি পাব ছবিখন।