হাতত মিঠাতেলৰ বটল, সন্মুখত গেছ চিলিণ্ডাৰ লৈ অভিনৱ প্ৰতিবাদ অসম প্ৰদেশ কংগ্ৰেছৰ

নিত্য ব্যবহার্য খাদ্য সামগ্রী, বিভিন্ন সেৱা আদিত জি এছ টি আৰোপ কৰি সৰ্বসাধাৰণ ৰাইজক অর্থনৈতিকভাৱে শোষণ কৰা আৰু ৰন্ধন গেছৰ মূল্য পুনৰ ৫০ টকাকৈ বৃদ্ধি কৰাৰ প্ৰতিবাদত বৃহস্পতিবাৰে অসম প্রদেশ মহিলা কংগ্ৰেছৰ আহ্বানক্রমে গুৱাহাটীত এক প্রতিবাদী কাৰ্যসূচী ৰূপায়ণ কৰা হয়।

সন্মুখত মিঠাতেলৰ বটল আৰু ৰন্ধন গেছৰ চিলিণ্ডাৰ লৈ ৰাজীৱ ভৱন চৌহদত শতাধিক মহিলা আৰু অসম প্রদেশ কংগ্ৰেছৰ কৰ্মকৰ্তাসকলে উদাত্ত শ্ল’গান দি চৰকাৰৰ এনে জনবিৰোধী নীতিৰ বিৰুদ্ধে প্ৰতিবাদ সাব্যস্ত কৰে।

অসম প্রদেশ মহিলা কংগ্ৰেছৰ সভানেত্রী মীৰা বৰঠাকুৰ গোস্বামীৰ লগতে মহিলা কংগ্ৰেছৰ ৰাজ্যিক নেতৃত্বৰ উপৰি প্ৰাক্তন মন্ত্ৰী প্ৰণতি ফুকন, বটদ্ৰৱাৰ বিধায়িকা শিৱামণি বৰা, বৰপেটা জিলা মহিলা কংগ্ৰেছৰ সভানেত্রী পদ্মাৱতী দাস, বজালী জিলা মহিলা কংগ্ৰেছ সভানেত্রী মৰমী দত্ত, কামৰূপ (গ্ৰাম্য)ৰ সভানেত্রী দীপালি তালুকদাৰ, গুৱাহাটী মহানগৰ সমিতিৰ সভানেত্রী গীতালি দাস, নলবাৰী জিলাৰ সভানেত্রী বিজুলী তালুকদাৰ, মৰিগাঁৱৰ সভানেত্রী শাহনাজ খানম প্রমুখ্যে বিভিন্ন জিলাৰ মহিলা নেত্ৰীসকলৰ উপৰি প্ৰদেশ কংগ্ৰেছৰ কৰ্মকৰ্তাসকলে মূল্যবৃদ্ধিৰ প্ৰতিবাদত ধর্ণা দি তাৎক্ষণিকভাৱে চৰকাৰী সিদ্ধান্ত প্ৰত্যাহাৰ কৰিবলৈ দাবী জনায়।

উপস্থিত প্রতিবাদী মহিলা সকলক উদ্দেশ্যি সভানেত্রী মীৰা বৰঠাকুৰে কয়, “সমগ্ৰ ৰাজ্যখনৰ মানুহক প্ৰলয়ংকাৰী বানে জুৰুলা কৰি অৰ্থনৈতিকভাৱে কোঙা কৰি দিয়াৰ সময়তে জি এছ টি আৰোপ আৰু ৰন্ধন গেছৰ মূল্যবৃদ্ধিৰে বিজেপি চৰকাৰে সৰ্বসাধাৰণ মানুহৰ জীৱন প্ৰণালী শেষ কৰি দিয়াৰ ষড়যন্ত্ৰত লিপ্ত হৈছে। ইয়াৰ বিৰুদ্ধে মহিলা সকলে তীব্র প্রতিবাদ গঢ়ি তোলা উচিত।”

ইফালে প্ৰাক্তন মন্ত্রী প্রণতি ফুকনেও সমবেত প্ৰতিবাদী কৰ্মকৰ্তাসকলক উদ্দেশ্যি বক্তব্য দাঙি ধৰি এই অভূতপূর্ব মূল্যবৃদ্ধিৰ বিৰুদ্ধে অসমৰ জিলাই জিলাই মহিলা কংগ্ৰেছৰ নেতৃত্বত জোৰদাৰ আন্দোলন গঢ়ি তোলাৰ ওপৰত গুৰুত্ব আৰোপ কৰে।