শৈক্ষিক গৱেষণাৰ সহযোগিতাৰ বাবে বড়োলেণ্ড বিশ্ববিদ্যালয়ৰ সৈতে আৰণ্যকৰ দ্বিপাক্ষিক চুক্তি

Aaranyak signs MoU with Bodoland University ভাৰতৰ আগশাৰীৰ গৱেষণা-আধাৰিত জৈৱ বৈচিত্ৰ সংৰক্ষণ সংগঠন আৰণ্যকে  গুৱাহাটীস্থিত আৰণ্যকৰ কাৰ্যালয়ত অসমৰ বড়োলেণ্ড বিশ্ববিদ্যালয়ৰ সৈতে এক দ্বিপাক্ষিক চুক্তি স্বাক্ষৰিত কৰে ৷ এই  চুক্তিত বড়োলেণ্ড বিশ্ববিদ্যালয়ৰ উপাচার্য অধ্যাপক লাইশ্রাম লাডু সিং আৰু আৰণ্যকৰ সচিব প্রধান তথা মুখ্য কাৰ্যবাহী বিষয়া ড০ বিভৱ কুমাৰ তালুকদাৰে স্বাক্ষৰ প্ৰদান কৰে।

এই চুক্তিৰ জৰিয়তে উত্তৰ-পূব ভাৰতত জৈৱ বৈচিত্ৰ সংৰক্ষণ আৰু পৰিৱেশ সুৰক্ষাৰ বাবে বৈজ্ঞানিক গৱেষণা, শিক্ষা আৰু প্ৰসাৰৰ লগতে মানৱ সম্পদ বিকাশৰ বাবে আৰণ্যক আৰু বড়োলেণ্ড বিশ্ববিদ্যালয়ে যুটীয়াভাৱে কাম কৰিব ৷

লগতে পঢ়ক: Sonowal Announces: নুমলীগড়ৰ জাহাজঘাটক অচিৰেই ব্যৱসায়িক বন্দৰলৈ উন্নীত কৰা হ’ব; ঘোষণা কেন্দ্ৰীয় মন্ত্ৰী সোনোৱালৰ

নামনি অসমৰ বড়োলেণ্ড বিশ্ববিদ্যালয় হৈছে উচ্চ শিক্ষাৰ একমাত্ৰ প্ৰতিষ্ঠান যি শিক্ষাৰ্থী আৰু সমাজৰ সৰ্বাধিক বিকাশৰ বাবে কাম কৰে।

আনহাতে, ১৯৮৯ চনত প্ৰতিষ্ঠিত আৰণ্যকে বন্যপ্ৰাণী তথা বন্যপ্ৰাণীৰ বাসস্থান বিষয়ক গৱেষণা আৰু সংৰক্ষণৰ লগতে ৰাষ্ট্ৰীয় উদ্যান আৰু সংৰক্ষিত বনাঞ্চলৰ ওচৰত বাস কৰা সম্প্ৰদায় সমূহৰ জীৱন আৰু জীৱিকা বিকাশৰ বাবে কাম কৰা কৰি আহিছে।

২০০৬ চনত ভাৰত চৰকাৰৰ বিজ্ঞান আৰু প্ৰযুক্তি মন্ত্ৰালয়ৰ বৈজ্ঞানিক আৰু ঔদ্যোগিক গৱেষণা বিভাগে আৰণ্যকক বৈজ্ঞানিক আৰু ঔদ্যোগিক গৱেষণা সংস্থা হিচাপে স্বীকৃতিও প্ৰদান কৰিছিল।

চুক্তি পত্ৰত স্বাক্ষৰ প্ৰদান কৰি বড়োলেণ্ড বিশ্ববিদ্যালয়ৰ উপাচাৰ্য অধ্যাপক লাইশ্রাম লাডু সিঙে বড়োলেণ্ড বিশ্ববিদ্যালয় আৰু আৰণ্যকৰ মাজত হোৱা এই চুক্তিয়ে বৈজ্ঞানিক গৱেষণা, প্ৰসাৰ আৰু শিক্ষাৰ লগতে পৰিৱেশ সংৰক্ষণ আৰু অঞ্চলটোৰ অন্যান্য দিশসমূহৰ বাবে মানৱ সম্পদ বিকাশৰ ক্ষেত্ৰত গুৰুত্বপুৰ্ণ ভুমিকা পালন কৰিব বুলি মন্তব্য কৰে ৷

আৰণ্যকৰ সচিব প্ৰধান ড০ বিভৱ কুমাৰ তালুকদাৰে ভৱিষ্যতৰ বাবে আগন্তুক প্ৰজন্মৰ দক্ষতা আৰু সক্ষমতা গঢ়ি তোলাৰ প্ৰয়োজনীয়তাৰ বিষয়েও মন্তব্য কৰি  দ্বিপাক্ষিক চুক্তিক জৈৱ বৈচিত্ৰ সংৰক্ষণ আৰু সমাজৰ বিকাশৰ বাবে এক উল্লেখনীয় পদক্ষেপ বুলিও মত প্ৰকাশ কৰে ।

লগতে পঢ়ক: Banned in parliament: পুনৰ সংসদত জাননী; এইবাৰ বন্ধ কৰা হৈছে ধৰ্ণা, বিক্ষোভ

এই চুক্তি স্বাক্ষৰৰ বাবে আয়োজিত এক বিশেষ অনুষ্ঠানত উপাচাৰ্যৰ গৰাকীৰ লগতে বিশ্ববিদ্যালয়খনৰ কেইবাগৰাকীও জ্যেষ্ঠ বিষয়া আৰু আৰণ্যকৰো কেইবা গৰাকীও জ্যেষ্ঠ বিজ্ঞানী উপস্থিত থাকে।