ৰাজস্থানত দুৰ্ঘটনাগ্ৰস্ত বায়ু সেনাৰ মিগ যুঁজাৰু বিমান: সন্ধানহীন পাইলট

ৰাজস্থানৰ বাৰ্মেৰ জিলাত দুৰ্ঘটনাত পতিত হৈছে ভাৰতীয় বায়ু সেনাৰ মিগ যুঁজাৰু বিমান। কিছু সময় পূৰ্বে, প্ৰায় ৯ বজাত এই দুৰ্ঘটনা সংঘটিত হৈছে বুলি জানিব পৰা গৈছে।

বাৰ্মেৰ জিলাৰ ভীমদা গাঁৱৰ পৰা প্ৰায় আধা কিলোমিটাৰ দূৰত্বত বিমানখনৰ ধ্বংসাৱশেষ সিঁচৰতি হৈ থকা অৱস্থাত উদ্ধাৰ কৰা হৈছে।

এই খবৰ প্ৰকাশৰ প্ৰকাশৰ লগে লগে জিলা উপায়ুক্ত, আৰক্ষী অধীক্ষক আৰু বায়ু সেনাৰ বিষয়াসকল ঘটনাস্থলীলৈ ৰাওনা হয়।

সূত্ৰ অনুসৰি, বিমানখনৰ ভিতৰত বায়ু সেনাৰ দুগৰাকী পাইলট আছিল। কিন্তু তেওঁলোকৰ অৱস্থান এতিয়ালৈকে জানিব পৰা হোৱা নাই।

এই ভয়াৱহ দুৰ্ঘটনা সংঘটিত হোৱাৰ সময়ত মিগ বিমানখন বায়তু অঞ্চলৰ ওপৰত এক প্ৰতিৰক্ষামূলক অভিযানত জড়িত আছিল বুলি জানিব পৰা গৈছে।

অৱশ্যে দুৰ্ঘটনাটোৰ সঠিক কাৰণ বৰ্তমান পৰ্যন্ত জানিব পৰা হোৱা নাই।

ইতিমধ্যে নিখোঁজ পাইলট দুগৰাকীৰ সন্ধানত উদ্ধাৰ অভিযান আৰম্ভ কৰা হৈছে বুলি কৰ্তৃপক্ষই সদৰি কৰিছে।