বিলকিছ বানো ধৰ্ষণ কাণ্ড: ধৰ্ষণকাৰীৰ মুক্তি সন্দৰ্ভত গুজৰাট চৰকাৰলৈ জাননী জাৰি উচ্চতম ন্যায়ালয়ৰ

দেশৰ ইতিহাসৰ এক কলংকিত অধ্যায় গুজৰাটৰ নৃশংস গোধৰা কাণ্ডৰ সময়ত সংঘটিত হোৱা বিলকিছ বানো দলবদ্ধ ধৰ্ষণ গোচৰত দোষীৰ মুক্তি সন্দৰ্ভত গুজৰাট চৰকাৰলৈ জাননী জাৰি কৰিছে উচ্চতম ন্যায়ালয়ে।

বিলকিছ বানো দলবদ্ধ ধৰ্ষণ গোচৰৰ ১১ জন দোষীক গুজৰাট চৰকাৰৰ দ্বাৰা ৰেহাই দিয়াৰ পাছত এই সিদ্ধান্তক প্ৰত্যাহ্বান জনাই দাখিল কৰা আৱেদনৰ শুনানি গ্ৰহণ কৰি আজি উচ্চতম ন্যায়ালয়ে গুজৰাট চৰকাৰলৈ জাননী জাৰি কৰে।

গুজৰাট চৰকাৰৰ সিদ্ধান্তৰ বিৰোধে চিপিআই(এম)ৰ পলিটব্যুৰো সদস্য সুভাষিনী আলী, তৃণমূল কংগ্ৰেছৰ সাংসদ মহুয়া মৈত্ৰা আৰু মহিলা অধিকাৰ কৰ্মীসকলে উচ্চতম ন্যায়ালয়ত লেখ আবেধদন দাখিল কৰিছিল।

মঙলবাৰে এই আবেদনসমূহ বিবেচনা কৰিবলৈ সন্মত হৈছিল শীৰ্ষ ন্যায়ালয় আৰু আজি মুখ্য ন্যায়াধীশ এন ভি ৰমনাৰ নেতৃত্বাধীন বিচাৰপীঠে গোচৰটোৰ শুনানি গ্ৰহণ কৰে।

উল্লেখ্য যে ২০০২ চনৰ গুজৰাটৰ নৃশংস গোধৰা সাম্প্ৰদায়িক সংঘৰ্ষৰ সময়ত সেই সময়ৰ ২১ বৰ্ষীয় বিলকিছ বানোক দলবদ্ধ ধৰ্ষণ কৰা হৈছিল। সেই সময়ত বানো আছিল ৫ মহীয়া গৰ্ভৱতী।

যোৱা ১৫ আগষ্টত গুজৰাট চৰকাৰে বানোৰ ধৰ্ষণ কাণ্ডত দোষী সাব্যস্ত হোৱা ১১ গৰাকী দোষীক কাৰাগাৰৰ পৰা মুকলি কৰি দিছিল।

গুজৰাট চৰকাৰৰ এই সিদ্ধান্তই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰিছিল। তাৰ পিছতেই শীৰ্ষ আদালতৰ দ্বাৰস্থ হৈছিল কেইবাগৰাকীও মহিলা কৰ্মী।