Ghulam Nabi Azad quits Congress: কংগ্ৰেছত মোক্ষম আঘাত! দলৰ সকলো পদবীৰ পৰা জ্যেষ্ঠ নেতা গোলাম নবী আজাদৰ পদত্যাগ

Ghulam Nabi Azad quits Congress ৰাহুল গান্ধীৰ বিৰুদ্ধে ‘ক্ষোভ’ উজাৰি কংগ্ৰেছৰ পৰা পদত্যাগ কৰিলে জ্যেষ্ঠ কংগ্ৰেছ নেতা গোলাম নবী আজাদে। তেওঁ কংগ্ৰেছৰ সকলো পদৰ পৰা পদত্যাগ কৰিছে। শুকুৰবাৰে আজাদে ছোনিয়া গান্ধীলৈ লিখা পদত্যাগ পত্ৰত নিজৰ ক্ষোভ উজাৰি দিছে।

দল ত্যাগ কৰাৰ পিছত তেওঁ মন্তব্য কৰি কয়, “কংগ্ৰেছে দেশৰ বাবে যি ভাল সেয়া কৰাত ব্যৰ্থ হৈছে।”

পাঁচ পৃষ্ঠাৰ পদত্যাগ পত্ৰত গোলাম নবীয়ে আজাদে লিখিছে, “সমগ্ৰ সাংগঠনিক নিৰ্বাচন প্ৰক্ৰিয়াটো এক প্ৰহসন। দেশৰ কোনো ঠাইতে সংগঠনটোৰ কোনো পৰ্যায়ত কোনো নিৰ্বাচন হোৱা নাই।‘’

লগতে পঢ়ক: Agnipath: ‘অগ্নিপথ’ বিতৰ্কৰ প্ৰভাৱ গোৰ্খা ৰেজিমেণ্টত; নিযুক্তি স্থগিত ৰাখিব বিচাৰিছে নেপালে

কংগ্ৰেছৰ প্ৰাক্তন সভাপতি ৰাহুল গান্ধীৰ নাম নোলোৱাকৈ তেওঁক লক্ষ্য কৰি প্ৰবীণ নেতাজনে কয় যে এই সকলোবোৰ ঘটিছে কাৰণ যোৱা আঠ বছৰত নেতৃত্ব দিয়া ব্যক্তিজন “অপৰিপক্ক”।

পদত্যাগ পত্ৰত আজাদে প্ৰাক্তন প্ৰধানমন্ত্ৰী ইন্দিৰা গান্ধীৰ সৈতে তেওঁৰ “ঘনিষ্ঠ সম্পৰ্ক”ৰ কথাও উল্লেখ কৰে।

গোলাম নবী আজাদে কেইদিনমান আগতে জম্মু আৰু কাশ্মীৰ প্ৰচাৰ সমিতি আৰু ৰাজনৈতিক পৰিক্ৰমা বিভাগৰ পেনেলৰ পৰা পদত্যাগ কৰিছিল। ২০২০ চনৰ আগষ্টত দলৰ নিৰ্বাচন আৰু স্থায়ী সভাপতি নিযুক্তিৰ দাবীত কংগ্ৰেছ অধ্যক্ষ ছোনিয়া গান্ধীলৈ চিঠি লিখা ২৩ জন নেতাৰ ভিতৰত আজাদো আছিল।

লগতে পঢ়ক: Delhi CM vs Assam CM: অসমৰ মুখ্যমন্ত্ৰীৰ বিদ্যালয়ৰ হিচাপ শুনি টুইটাৰত এইবাৰ নতুন প্ৰত্যাহ্বান দিল্লীৰ মুখ্যমন্ত্ৰীৰ

কিছুদিন পূৰ্বে কংগ্ৰেছৰ ‘ক্ষুব্ধ’ গোটৰ নেতা হিচাপে পৰিচিত আনন্দ শৰ্মাই হিমাচল প্ৰদেশৰ ‘পৰ্যবেক্ষক সমিতি’ৰ মুৰব্বীৰ পদৰ পৰা পদত্যাগ কৰে। হিমাচল প্ৰদেশত নিৰ্বাচন আহি আছে। ইয়াৰ পূৰ্বে আনন্দ শৰ্মাৰ পদত্যাগে কংগ্ৰেছ শিবিৰত অস্থিৰতাৰ সৃষ্টি কৰিছে। সেই ঘটনাৰ পিছতে এইবাৰ গোলাম নবী আজাদৰ কংগ্ৰেছ ত্যাগে কংগ্ৰেছৰ ভিতৰত ক্ৰমে অসন্তুষ্টি বৃদ্ধি পোৱাৰে ইংগিত দিয়ে।