উৰিষ্যাত নদীত ডুব গ’ল যাত্ৰীবাহী নাও: এগৰাকী সন্ধানহীন

উৰিষ্যাৰ মালকানগিৰি জিলাত কুতুমপালি নদীত শুকুৰবাৰে সংঘটিত হয় এক ভয়াৱহ নাও দুৰ্ঘটনা। ১২ গৰাকী যাত্ৰীৰ লগতে ৩ খনকৈ বাইক কঢ়িয়াই নিয়া এখন মটৰ নাও নদীত ডুব যোৱাৰ ফলত ১ গৰাকী যাত্ৰী সন্ধানহীন হয়।

প্ৰকাশিত খবৰ অনুসৰি দলং নিৰ্মাণত নিয়োজিত ১২ গৰাকী কৰ্মচাৰী নাওখনত যাত্ৰা কৰিছিল। কিন্তু নদীৰ মাজতে নাওখনে ভাৰসাম্য হেৰুৱায় আৰু ওলোটাকৈ পৰি যায়।

দুৰ্ঘটনাৰ প্ৰকৃত কাৰণ এতিয়াও জানিব পৰা হোৱা নাই যদিও অধিক বোজাইৰ বাবেই এই দুৰ্ঘটনা সংঘটিত হয় বুলি সন্দেহ কৰা হৈছে।

ইফালে নাওখন ডুবি যোৱাৰ পিছতে নাৱত থকা ১২ গৰাকী যাত্ৰীৰ ভিতৰত ছয় গৰাকীয়ে সাতুৰি পাৰলৈ উঠিবলৈ সক্ষম হয়। আনহাতে উদ্ধাৰকাৰী দলৰ অভিযানত পাঁচগৰাকী যাত্ৰী উদ্ধাৰ হয় যদিও এগৰাকীৰ সন্ধান উলিওৱাত বিফল হয় দলটো।

সন্ধানহীন ব্যক্তিগৰাকীক মধ্য প্ৰদেশৰ বাসিন্দা কৈলাশ শ্বাহ বুলি চিনাক্ত কৰা হৈছে। পেছাত কনিষ্ঠ অভিযন্তা শ্বাহক এতিয়ালৈকে বিচাৰি উলিয়াব পৰা নাই বুলি স্থানীয় কৰ্তৃপক্ষই জানিবলৈ দিছে।