টীয়কত সোপাধৰাৰ আতংকঃ পুৱাই ফেৰীৱালাক ধৰি হাৰাশাস্তি , কোনোমতে প্ৰাণৰক্ষা কৰি থানাত উপস্থিত ৯ জনকৈ ক্ষুদ্ৰ ব্যৱসায়ী

সমগ্ৰ ৰাজ্যতে সোপাধৰাক লৈ সৃষ্টি হোৱা আতংকৰ মাজতে আজি পুৱা টীয়কৰ উমাবাৰী চাহ বাগিচাৰ খেৰনী অঞ্চলত টীয়কৰ কাকজান মৰিয়াগাঁৱৰ কেইবাজনো ফেৰীৱালাক ৰাইজে হাৰাশাস্তি কৰাৰ অভিযোগ উত্থাপিত হৈছে।

জানিবপৰা মতে আজি পুৱা আন দিনৰ দৰে এইসকল ফেৰীৱালাই বিভিন্ন সামগ্ৰী বিক্ৰীৰ বাবে সেই পথে কেইবাখনো গাড়ীসহ যাত্ৰা কৰোতে সোপাধৰাৰ সন্দেহত স্থানীয় একাংশ আতংকিত ৰাইজে ব্যৱসায়ীকেইজনক প্ৰথমে সোধাপোচা কৰে আৰু পৰৱৰ্ত্তী সময়ত উত্তেজিত হৈ ব্যৱসায়ীকেইজনে নিজৰ পৰিচয় পত্ৰ দেখুওৱাৰ পাছত প্ৰাণে মৰাৰ ভাবুকি দিয়ে ।

লোকসকলে নিজকে গাঁওৰক্ষী বাহিনীৰ সদস্য বুলি চিনাকি দি পৰিচয় পত্ৰ ছিঙি পেলায় আৰু মাৰধৰ কৰিবলৈ আগবাঢ়ি আহে। অৱশ্যে কোনোমতে ব্যৱসায়ীকেইজন পলাই আহি টীয়ক আৰক্ষী থানাত উপস্থিত হয় l ইতিমধ্যে ঘটনাৰ সন্দৰ্ভত এজাহাৰ দাখিল কৰিছে ।

এই ক্ষেত্ৰত অনতি পলমে উচিত ব্যৱস্থা গ্ৰহণ কৰি এইসকল যুৱকক কাম কৰি পৰিয়াল পোহপাল দিয়াত সহায়ৰ হাত আগবঢ়াবলৈ সকলো পক্ষলৈ আহ্বান জনাইছে।