বিহাৰত ভয়াৱহ নাও দুৰ্ঘটনা: প্ৰাণ হেৰুৱালে সাত যাত্ৰীয়ে

বিহাৰত গঙ্গা আৰু ইয়াৰ এখন উপনদীৰ সঙ্গমস্থলত শনিবাৰে সংঘটিত হয় এক ভয়াৱহ নাও দুৰ্ঘটনা। এখন যাত্ৰীবাহী নাও ডুব যোৱাৰ ফলত মৃত্যু হয় নাৱত থকা ৭ গৰাকী লোকৰ।

কাটিহাৰৰ জিলাৰ এগৰাকী শীৰ্ষ প্ৰশাসনিক বিষয়াই আজি জানিবলৈ দিয়া মতে নাওখনত কামৰ পৰা উভতি অহা ১০ গৰাকী কৃষি শ্ৰমিকে যাত্ৰা কৰিছিল। যাত্ৰাৰ সময়তে সন্ধিয়া গঙ্গা আৰু বাৰাণ্ডিৰ সঙ্গমস্থলত নাওখন ডুব যায়।

নাওখনত থকা তিনিগৰাকী ব্যক্তিয়ে সাতুৰি পাৰলৈ উঠিবলৈ সক্ষম হয় যদিও বাকী সাতগৰাকী যাত্ৰী সন্ধানহীন হয়।

বিষয়াগৰাকীয়ে লগতে উল্লেখ কৰা মতে স্থানীয় ডুবাৰু আৰু এন ডি আৰ এফৰ কৰ্মীৰ সহায়ত গোটেই ৰাতি চলি থকা অনুসন্ধান অভিযানৰ পিছত তেওঁলোকৰ মৃতদেহ উদ্ধাৰ হয়।

ইফালে বিহাৰৰ মুখ্যমন্ত্ৰী নীতিশ কুমাৰে ঘটনাটোত শোক প্ৰকাশ কৰি জিলা প্ৰশাসনক মৃতকৰ পৰিয়ালৰ সদস্যসকলক ৪ লাখ কৈ টকাৰ অনুদান প্ৰদান কৰিবলৈ নিৰ্দেশ দিয়ে।