ইছলামিক আইনেৰে পৰিচালিত হ’ব আফগানিস্তান: সম্পূৰ্ণৰূপে কাৰ্যকৰী কৰিবলৈ নিৰ্দেশ সৰ্বোচ্চ নেতা আখুন্দজাদাৰ

বিগত বৰ্ষৰ আগষ্টত কট্টৰ ইছলামিক সংগঠন তালিবানে আফগানিস্তানৰ ক্ষমতা দখলৰ পিছৰ পৰাই দেশখনত মানৱ অধিকাৰ হৰণে বিশ্ব সম্প্ৰদায়ক উদ্বিগ্ন কৰি তুলিছে। আফগানী জনসাধাৰণৰ মানৱ অধিকাৰৰ পৰিস্থিতিক লৈ বাঢ়ি অহা উদ্বেগৰ মাজতে তালিবানৰ সৰ্বোচ্চ নেতা মৌলৱী হেবাতুল্লা আখুন্দজাদাই দেশখনত ইছলামিক আইন সম্পূৰ্ণৰূপে কাৰ্যকৰী কৰিবলৈ নিৰ্দেশ দিছে।

তালিবানৰ মুখপাত্ৰ জাবিহুল্লাহ মুজাহিদে এক বিবৃতিত উল্লেখ কৰা মতে তালিবানৰ সৰ্বোচ্চ নেতাগৰাকীয়ে দেশখনৰ ন্যায়াধীশসকলৰ এটা গোটৰ সৈতে সাক্ষাৎ কৰাৰ পিছত এই আদেশ ঘোষণা কৰিছে।

দেওবাৰে এক টুইট যোগে জাবিহুল্লাহ মুজাহিদে উল্লেখ কৰা মতে শ্বৰিয়া চৰ্ত সম্পূৰ্ণৰূপে উলংঘন কৰা অপৰাধীসকলৰ ওপৰত শ্বৰিয়া আইনৰ অধীনত বাধ্যতামূলকভাৱে শাস্তি জাৰি কৰিবলৈ আখুন্দজাদাই নিৰ্দেশ প্ৰদান কৰিছে।

তালিবানৰ আন এগৰাকী মুখপাত্ৰই ইছলামিক আমিৰাতৰ নেতাগৰাকীৰ এই আদেশ সমগ্ৰ দেশতে কাৰ্যকৰী কৰা হ’ব বুলি স্পষ্ট কৰি দিছে। এক আন্ত:ৰাষ্ট্ৰীয় সংবাদ সংস্থাৰ সৈতে সাক্ষাৎকাৰত তালিবানৰ মুখপাত্ৰ ইউচেফ আহমেদীয়ে কয়, “যিসকল হত্যা, অপহৰণ আৰু চুৰিৰ সৈতে জড়িত, তেওঁলোকক তেওঁলোকৰ কাৰ্যৰ বাবে শাস্তি দিব লাগিব।”

উল্লেখ্য যে তালিবানে শাসনলৈ অহাৰ পিছতে দেশখনৰ মহিলাসকলক অসামৰিক সেৱাৰ নেতৃত্বৰ পদৰ পৰা বৰ্খাস্ত কৰাৰ লগতে অধিকাংশ প্ৰদেশতে কন্যা শিক্ষাৰ্থীক মাধ্যমিক বিদ্যালয়ত শিক্ষাগ্ৰহণ নিষেধ কৰিছে।

তালিবানৰ আদেশ অনুসৰি, লগত কোনো পুৰুষ আত্মীয় নাথাকিলে মহিলাসকলক ভ্ৰমণ কৰাতো বাধা আৰোপ কৰাৰ লগতে ৰাজহুৱাস্থানত মহিলাৰ মুখ ঢাকি ৰাখিবলৈ নিৰ্দেশ দিয়া হৈছিল। দেশখনৰ মহিলা সকলৰ ওপৰত আৰোপ কৰা এনে বাধা-নিষেধৰ বিৰুদ্ধে মহিলাসকলে ৰাজপথত নামি বিক্ষোভ প্ৰদৰ্শনো কৰিছিল।

দেশখনৰ সংবাদ মাধ্যমৰ ওপৰতো তালিবানে কঠোৰভাৱে চেঞ্চৰ আৰোপ কৰিছে। তালিবানৰ বিৰুদ্ধে সমালোচনাত্মক প্ৰতিবেদনত বাধ্যবাধকতা আৰোপ কৰাৰ লগতে সাংবাদিকসকলক আটক তথা প্ৰহাৰ পৰ্যন্ত কৰা হৈছে।

তালিবানৰ এনে কঠোৰতম শাসন ব্যৱস্থাৰ বিৰুদ্ধে বিশ্বৰ মানৱ অধিকাৰ গোটসমূহ সৰৱ হৈ পৰিছে। তালিবান বাহিনীয়ে প্ৰতিশোধ মূলক হত্যাকাণ্ড সংঘটিত কৰাৰ অভিযোগ তুলি মানৱ অধিকাৰ গোটসমূহে তালিবানক কঠোৰ নিন্দা কৰি আহিছে।