কলেজলৈ যোৱাৰ পথতে প্ৰবক্তা পত্নীক ডিঙি কাটি হত্যাৰ চেষ্টা পতিৰ: সংকটজনক অৱস্থাত চিকিৎসালয়ত ভৰ্তি

বৃহস্পতিবাৰে পুৱা অন্ধ্ৰপ্ৰদেশৰ অনন্তপুৰত সংঘটিত এক নৃশংস ঘটনাই তীব্ৰ চাঞ্চল্যৰ সৃষ্টি কৰিছে। জিলাখনৰ এখন মহাবিদ্যালয়ত প্ৰবক্তা হিচাপে কৰ্মৰত এগৰাকী মহিলাক মহাবিদ্যালয়লৈ যোৱাৰ পথতে বৰ্বৰভাৱে ডিঙি কাটি হত্যাৰ চেষ্টা চলায় তেওঁৰ পতিয়ে।

ঘটনা সন্দৰ্ভত আৰক্ষীয়ে সদৰী কৰা অনুসৰি আক্ৰমণৰ সন্মুখীন হোৱা সুমংগলী নামৰ মহিলাগৰাকী অনন্তপুৰৰ এখন কলা মহাবিদ্যালয়ৰ প্ৰবক্তা। বৃহস্পতিবাৰে পুৱা প্ৰায় ৯.৩০ বজাত নিজৰ কৰ্মস্থলীলৈ যোৱাৰ সময়তে তেওঁৰ স্বামীয়ে সুমংগলীক আক্ৰমণ কৰে।

সুমংগলীৰ স্বামীয়ে এখন চোকা ছুৰীৰে তেওঁৰ ডিঙি কাটি হত্যা কৰিবলৈ চেষ্টা কৰিছিল। কিন্তু এই আক্ৰমণত গুৰুতৰভাৱে আহত হ’লেও সুমংগলীৰ প্ৰাণ ৰক্ষা পৰে।

ইফালে আক্ৰমণৰ পিছত মহিলাগৰাকীৰ স্বামীয়ে মহাবিদ্যালয় চৌহদৰ বাহিৰত কিছুসময় ধৰি হুলস্থূলৰ সৃষ্টি কৰিছিল যদিও ঘটনাস্থলীত ক্ৰমে সমাগম বৃদ্ধি পাবলৈ ধৰা দেখি সেই স্থানৰ পৰা পলায়ন কৰে।

আনহাতে অতৰ্কিত আক্ৰমণত মাটিত পৰি যোৱা সুমংগলীক লগে লগে কাষৰে এক চিকিৎসালয়লৈ লৈ যোৱা হয়। বৰ্তমান তেওঁ সংকটমুক্ত যদিও আঘাত যথেষ্ট গুৰুতৰ বুলি জানিবলৈ দিছে আৰক্ষীয়ে।

অনন্তপুৰৰ এগৰাকী আৰক্ষী বিষয়াই উল্লেখ কৰা মতে যোৱা ১৮ বছৰ পূৰ্বে বিবাহপাশত আৱদ্ধ হোৱাৰ পিছত দীৰ্ঘদিন ধৰি সুমংগলী পতিৰ সৈতে একেলগে আছিল যদিও যোৱা কেইমাহমান পূৰ্বে বিবাহ বিচ্ছেদৰ বাবে আবেদন পৃথকে বাস কৰি আআছে

বিষয়া গৰাকীয়ে এই সন্দৰ্ভত উল্লেখ কৰা মতে বিবাহ বিচ্ছেদৰ বাবে আবেদন কৰাৰ পিছৰে পৰা সুমংগলীৰ স্বামী অপমানিত বোধ কৰিছিল আৰু ইয়াৰ পৰিণতিত প্ৰতিশোধ পৰায়ন হৈ পৰিছিল।

এই প্ৰতিশোধ পূৰণৰ বাবে তেওঁ সুমংগলীৰ ডিঙি কাটি হত্যা কৰিবলৈ চেষ্টা কৰিছিল। কিন্তু সৌভাগ্যক্ৰমে সুমংগলী মৃত্যুৰ পৰা ৰক্ষা পৰিছে।

আৰক্ষী বিষয়াগৰাকীয়ে লগতে ঘটনা সন্দৰ্ভত এক গোচৰ ৰুজু কৰা হৈছে পলাতক ব্যক্তিগৰাকীক আটক কৰাৰ বাবে অনুসন্ধান চলাই থকা হৈছে বুলি জানিবলৈ দিয়ে।