৫৮ বৰ্ষীয় ব্যক্তিৰ পেটত ওলাল ১৮৭টা মুদ্ৰা! হতভম্ব চিকিৎসকো

৫৮ বৰ্ষীয় এগৰাকী সাধাৰণ ব্যক্তি। অস্বাভাৱিক হাৰত ব্যক্তিগৰাকীৰ পেট ফুলি উঠা দেখি পৰিয়ালৰ লোকে তেওঁক চিকিৎসকৰ ওচৰলৈ লৈ যায়। অসহ্য বিষত ধৰফৰাই থকা ব্যক্তিগৰাকীক চিকিৎসকে পৰীক্ষা কৰাৰ সময়তে পেটত বহু ধাতুৰ উপস্থিতি ধৰা পেলায়।

এই অকল্পনীয় অৱস্থিতি ধৰা পেলোৱাৰ পিছত চিকিৎসকে অৱশেষত ব্যক্তিগৰাকীৰ অপাৰেচন কৰি পেটৰ পৰা মুঠ ১৮৭ টা মুদ্ৰা উলিয়াই আনে। এই আশ্চৰ্যজনক ঘটনা সংঘটিত হৈছে কৰ্ণাটকত।

ৰাজ্যখনৰ বাগালকোটেৰ এইচ এছ কে হাস্পতালৰ চিকিৎসকে দ্যামাপ্পা হৰিজন নামৰ ব্যক্তিজনৰ পেটৰ পৰা এই ১৮৭ টা মুদ্ৰা উলিয়াই অনাৰ পিছত হতভম্ব হৈ পৰিছে।

জানিব পৰা মতে দ্যামাপ্পা স্কিজ’ফ্ৰেনিয়া ৰোগত আক্ৰান্ত আছিল। চিকিৎসকে প্ৰথমে এক্স-ৰে কৰি দ্যামাপ্পাই গিলি পেলোৱা মুদ্ৰাসমূহ ধৰা পেলায়। পুনৰ নিশ্চিত কৰিবলৈ চিকিৎসকে এণ্ড’স্কপি কৰে।

এণ্ড’স্কপিৰ জৰিয়তে সম্পূৰ্ণ নিশ্চিত হোৱাৰ পিছত চিকিৎসকে গেষ্ট্ৰ’টমীৰ অস্ত্ৰোপচাৰ কৰি তেওঁৰ পেটৰ পৰা এই বৃহৎ সংখ্যক মুদ্ৰা বাহিৰলৈ উলিয়াই আনে।

সংবাদ মাধ্যমৰ সৈতে বাৰ্তালাপ কৰি অস্ত্ৰোপচাৰ বিশেষজ্ঞ ঈশ্বৰ কালবুৰ্গীয়ে কয়, ‘এয়া এক প্ৰত্যাহ্বানজনক পৰিস্থিতি আছিল। পেটটো বেলুনৰ দৰে হৈ পৰিছিল আৰু পেটত এটকা, দুটকা আৰু পাঁচ টকীয়া মুঠ ১.২ কিলোগ্ৰাম মুদ্ৰাৰে ভৰি আছিল।”

অপাৰেচনৰ পিছত চিকিৎসকে জানিবলৈ দিয়া মতে দ্যামাপ্পাই ৫৬ টা পাঁচটকীয়া মুদ্ৰা, ৫১ টা দুটকীয়া মুদ্ৰা আৰু ৮০ টা একটকীয়া মুদ্ৰা গিলি পেলাইছিল।

দ্যামপ্পাই এনেদৰে মুদ্ৰা গিলি পেলোৱাৰ বিষয়ে তেওঁৰ পৰিয়াল জ্ঞাত নাছিল। পেটৰ বিষ আৰু বমি হোৱাৰ ফলত চিকিৎসালয়লৈ নিয়াৰ পিছতহে তেওঁলোকে এই বিষয়ে জানিব পাৰিছিল।

দ্যামাপ্পাৰ পুত্ৰ ৰবিকুমাৰৰ ভাষ্য মতে দ্যামাপ্পা মানসিকভাৱে অসুস্থ আছিল যদিও প্ৰতিদিনে নিজৰ ৰুটিন কাম কৰিছিল। এনেদৰে মুদ্ৰাবোৰ গিলি পেলোৱাৰ কথা তেওঁ পৰিয়ালৰ কোনো সদস্যকে জনোৱা নাছিল।

“কিছুদিন পূৰ্বে অস্বাভাৱিক ধৰণে তেওঁৰ পেট ফুলি যোৱাৰ লগতে বিষ আৰু বমি হোৱাৰ পিছত তেওঁক চিকিৎসালয়লৈ লৈ যাওঁ আৰু স্কেনৰ পিছতহে আমি এই বিষয়ে জানিব পাৰোঁ।”— ৰবিকুমাৰে লগতে কয়।

ইফালে বহুদিন ধৰি তীব্ৰ যন্ত্ৰণাত ভূগি থকা দ্যামাপ্পা অপাৰেচনৰ পিছত এতিয়া সুস্থ অৱস্থাত আছে বুলিও ৰবিকুমাৰে লগতে কয়।