জয়ী হ’ব কোন, ব্ৰাজিল নে আৰ্জেণ্টিনা! ফুটবল বিশ্বকাপ বিবাদত বন্ধুৰ হাতত প্ৰাণ হেৰুৱালে যুৱকে

ব্ৰাজিল বা আৰ্জেন্টিন! কোনটো দল সৰ্বোত্তম? কোনে জয় কৰিব বিশ্ব? কোনে চুম্বন কৰিব বিশ্বকাপৰ সোণালী ট্ৰফীত? পাঁচ দিন ধৰি কেৱল এই আলোচনাৰ উত্তেজনা আৰু উত্তেজনা চৰম বিন্দুত উপনীত হোৱাৰ পিছত বন্ধুৰ হাততে প্ৰাণ হেৰুৱাইছে এগৰাকী যুৱকে। এই চাঞ্চল্যকৰ হত্যাকাণ্ড সংঘটিত হৈছে বাংলাদেশত।

চলিত কাটাৰ বিশ্বকাপৰ বতাহে সমগ্ৰ বিশ্বৰ ফুটবলপ্ৰেমীক আচ্ছন্ন কৰি ৰখাৰ সময়তে কোনে এই বিশ্বকাপ খিতাপ আজুৰি আনিব পাৰিব, তাকে কেন্দ্ৰ কৰি হোৱা বিবাদৰ ফলত বাংলাদেশৰ সদৰ উপজিলাৰ দক্ষিণ নানুপুৰ অঞ্চলত এগৰাকী যুৱকে নিজ বন্ধুক হত্যা কৰে।

জানিব পৰা মতে, সোমবাৰে নিশা সংঘটিত হয় এই ঘটনা। অঞ্চলটোৰ স্থানীয় ভাৰপ্ৰাপ্ত আৰক্ষী বিষয়াগৰাকীয়ে জানিবলৈ দিয়া মতে, মৃত ১৮ বছৰীয়া মেহদি হাছান বুলি চিনাক্ত কৰা হৈছে।

হত্যাৰ বলি হোৱা মেহদীৰ সমবয়সীয়া বন্ধু তথা হত্যাকাণ্ডৰ অভিযুক্ত বৰকত বেপাৰীক আৰক্ষীয়ে ইতিমধ্যে গ্ৰেপ্তাৰ কৰিছে। ঘটনা সন্দৰ্ভত আৰক্ষী বিষয়াগৰাকীয়ে উল্লেখ কৰা মতে, ব্ৰাজিলৰ সমৰ্থক মেহদীয়ে আৰ্জেণ্টিনাৰ সমৰ্থক বৰকাতৰ সৈতে বিশ্বকাপৰ সম্ভাৱ্য বিজয়ীক লৈ তৰ্কত লিপ্ত হৈছিল।

এটা সময়ত এই তৰ্কাতৰ্কি চৰম হৈ পৰাৰ পিছত বৰকটে বন্ধু মেহদীক ছুৰীৰে আঘাত কৰে। পিছত আহত মেহদীক ৰক্তাক্ত অৱস্থাত চান্দপুৰ সাধাৰণ চিকিৎসালয়লৈ নিয়ে যদিও চিকিৎসকে তেওঁক মৃত ঘোষণা কৰে।

আৰক্ষীয়ে অভিযুক্ত বৰকটক গ্ৰেপ্তাৰ কৰি থানালৈ লৈ যায় বুলি উল্লেখ কৰি নিহত মেহদী হাছানৰ পিতৃ হেলালুদ্দিনে তেওঁৰ পুত্ৰৰ হত্যাকাৰীৰ সৰ্বোচ্চ শাস্তি হিচাপে ফাঁচী দিয়াৰ দাবী জনাইছে।

উল্লেখ্য যে, কাটাৰ বিশ্বকাপত ইতিমধ্যে খিতাপৰ প্ৰবল দাবীদাৰ- আৰ্জেণ্টিনা আৰু ব্ৰাজিল, দুয়োটা দলেই অন্তিম ১৬- ত প্ৰৱেশ কৰিছে। ইতিপূৰ্বেই কেৰিয়াৰৰ অন্তিম বিশ্বকাপ খেলা বুলি ঘোষণা কৰা মহাতাৰকা লিঅ’ মেছিয়ে আৰ্জেণ্টিনাৰ হৈ বিশ্বকাপৰ খিতাপত চুম্বন দিব পাৰিবনে, সেয়া লক্ষণীয় হ’ব।

আনহাতে ‘ফুটবলৰ দেশ’ হিচাপে পৰিচিত তাৰকাসমৃদ্ধ ব্ৰাজিলে ষষ্ঠবাৰৰ বাবে বিশ্বকাপৰ খিতাপ নিজৰ দখললৈ আনিব পাৰিবনে সিও হ’ব লক্ষণীয়। মুঠৰ ওপৰত কোনে দখল কৰিব কাটাৰ বিশ্বকাপ- সেই সম্ভাৱনাৰ উত্তৰলৈ উদগ্ৰীৱ হৈ বাট চাইছে ফুটবলপ্ৰেমীয়ে।