সস্তাত বিচাৰিছিল তেল; পাকিস্তানৰ অনুৰোধ কৰ্ণপাতেই নকৰিলে ৰাছিয়াই

Russia refuses to sell crude oil to Pakistan ইউক্ৰেইন যুদ্ধৰ পৰিপ্ৰেক্ষিতত ভাৰতে কম দামত ৰাছিয়াৰ পৰা ইন্ধন তেল ক্ৰয় কৰি আছে। আমেৰিকা যুক্তৰাষ্ট্ৰ আৰু পশ্চিমীয়া দেশসমূহৰ পৰা বিত্তীয় নিষেধাজ্ঞাৰ বোজা পৰিহাৰ কৰিবলৈ মস্কোৱে দিল্লীৰ “বন্ধুত্ব”ৰ ওপৰত নিৰ্ভৰ কৰিছে। যুদ্ধৰ পৰিস্থিতিৰ সুযোগতে পাকিস্তানেও কম দামত ৰাছিয়াৰ পৰা তেল ক্ৰয় কৰিব বিচাৰিছিল। কিন্তু পুটিন প্ৰশাসনে ইছলামাবাদৰ কথাত গুৰুত্বই নিদিলে।

বাতৰি অনুসৰি, পাকিস্তানে ৰাছিয়াৰ ইন্ধন তেলৰ ওপৰত ৩০ ৰ পৰা ৪০ শতাংশ ৰেহাই বিচাৰিছিল। কিন্তু ৰাছিয়াই সেই অনুৰোধ নাকচ কৰিছে।

লগতে পঢ়ক: আজি অসম দিৱস; বৰ অসমৰ ভেটি গঢ়োতা স্বর্গদেউ চাওলুং চুকাফাক সুঁবৰিছে ৰাজ্যবাসীয়ে

পাকিস্তানৰ পেট্ৰ’লিয়াম ৰাজ্যিক মন্ত্ৰী মুচাদিক মালিক আৰু শ্বাহবাজ শ্বৰীফ প্ৰশাসনৰ শীৰ্ষ আমোলাসকলে বুধবাৰে মস্কোত ৰাছিয়াৰ প্ৰতিনিধিসকলক সাক্ষাৎ কৰে। আলোচনাৰ শেষত পুটিন চৰকাৰে স্পষ্ট কৰি দিয়ে যে এনে ৰেহাইত তেল বিক্ৰী কৰা সম্ভৱ নহয়। যদিহে  ভৱিষ্যতে কোনো সম্ভাৱনা থাকে সেয়া অৱগত কৰা হ’ব।

জিঅ’ নিউজৰ মতে, পাকিস্তানী প্ৰতিনিধি দলটো তিনিদিনীয়া ভ্ৰমণসূচীৰে ২৯ নৱেম্বৰত মস্কোত উপস্থিত হৈছিল।

লগতে পঢ়ক: আফগানিস্তানলৈ গৈছে লস্কৰ-জৈশৰ দৰে পাকিস্তানী সন্ত্ৰাসবাদী গোট: দাবী প্ৰাক্তন আফগান সুৰক্ষা প্ৰধানৰ

পৰ্যবেক্ষকসকলৰ মতে, এই মুহূৰ্তত ৰাছিয়াই ভাৰত আৰু চীনৰ দৰে ডাঙৰ আৰু বিশ্বাসী দেশবোৰক সস্তাত তেল বিক্ৰী কৰি আছে। এই দুয়োখন দেশৰ সৈতে মস্কোৰ সম্পৰ্ক দীৰ্ঘদিনীয়া। কিন্তু পুটিন প্ৰশাসনে সুযোগ বিচাৰি থকা পাকিস্তানক বিশ্বাস নকৰে।

সূত্ৰ অনুসৰি, মস্কোৱে সস্তাত তেল ক্ৰয় কৰাৰ আগতে ‘পাকিস্তান ষ্ট্ৰীম’ গেছ পাইপলাইন সম্পূৰ্ণ কৰাৰ দাবী জনাইছে। ৰাছিয়াই পাকিস্তানৰ কৰাচী বন্দৰৰ পৰা পঞ্জাৱ প্ৰদেশলৈ পাইপলাইন নিৰ্মাণ কৰাৰ কথা আছিল যদিও কামটো স্থগিত হৈ আছে।

উল্লেখ্য যে ভাৰতে ৰাছিয়াৰ তেল ক্ৰয় কৰাৰ বাবে পশ্চিমীয়া দেশসমূহৰ পৰা বাৰে বাৰে সমালোচনাৰ সন্মুখীন হৈছে। ভাৰতত ৰাছিয়াৰ ৰাষ্ট্ৰদূত ডেনিছ অলিপাভে এই সন্দৰ্ভত কটাক্ষ কৰিছিল।

লগতে পঢ়ক: বিশ্ব ফুটবলত এছিয়াৰ মহাশক্তি! স্পেইনক হৰুৱাই জাৰ্মানীকো বিশ্বকাপৰ বাহিৰ কৰিলে জাপানে

তেওঁ কৈছিল, “পশ্চিমীয়া দেশসমূহে ৰাছিয়াৰ পৰা ভাৰতৰ তেল ক্ৰয়ক গৰিহণা দিছে। আনহাতে, তেওঁলোকে নিজেই ৰাছিয়াৰ শক্তি ক্ৰয় কৰি আছে। গতিকে বুজা যায় যে ইউৰোপীয় দেশবোৰে নিজে নিয়ম প্ৰস্তুত কৰিলেও তেওঁলোকে সেই নিয়মবোৰ অনুসৰণ কৰা নাই।‘’