বিহাৰ সুৰা ট্ৰেজেডী: এতিয়ালৈকে নিহত হৈছে ৬৫ জন, অবৈধ সুৰাই প্ৰাণ লোৱা লোকক ক্ষতিপূৰণ নিদিয়ে নীতিশ চৰকাৰে

সুৰা নিষিদ্ধ বিহাৰত অবৈধ বিষাক্ত সুৰাই পাতিছে মৰণ ফান্দ। ৰাজ্যখনৰ চৰণ জিলাৰ চাপৰাত বিষাক্ত সুৰা সেৱনৰ ফলত এতিয়ালৈকে মৃত্যু হৈছে ৬৫ গৰাকী লোকৰ। ২০১৬ চনত নীতিশ কুমাৰৰ চৰকাৰে সুৰাৰ ওপৰত নিষেধাজ্ঞা আৰোপ কৰাৰ পিছৰে পৰা সুৰাই সৃষ্টি কৰা মৃত্যুলীলাৰ ক্ষেত্ৰত এয়াই সৰ্বাধিক হিচাপে পৰিগণিত হৈছে।

সুৰাৰ ওপৰত নিষেধাজ্ঞা আৰোপ কৰাৰ পাছতো এই নিষেধাজ্ঞা কাৰ্যকৰী কৰাত শিথিলতাৰ অভিযোগত বিধানসভাৰ লগতে ৰাজ্যজুৰি বিৰোধী বিজেপিৰ তীব্ৰ প্ৰতিবাদৰ সন্মুখীন হ’বলগীয়া হৈছে জেডিইউ-আৰজেডি চৰকাৰ।

ইফালে আজি বিধানসভাত নীতিশ কুমাৰে নিজৰ স্থিতিৰ পুনৰাবৃত্তি কৰি অবৈধ মদ খাই মৃত্যু হোৱা লোকক কোনোধৰণৰ ক্ষতিপূৰণ প্ৰদান কৰা নহ’ব বুলি দোহাৰে। তেওঁ লগতে নিষেধাজ্ঞা আৰোপৰ পিছত পূৰ্বতকৈ বিহাৰত বিষাক্ত সুৰা পান কৰা লোকৰ সংখ্যা কম বুলি দাবী কৰে।

মুখ্যমন্ত্ৰী নীতিশ কুমাৰে লগতে সংবাদ মাধ্যমে এনে ক্ষেত্ৰত পক্ষপাতিত্বমূলক সংবাদ পৰিৱেশন কৰাৰো গুৰুতৰ অভিযোগ তুলিছে। বিজেপি শাসিত ৰাজ্য মধ্য প্ৰদেশ, হাৰিয়ানা, উত্তৰ প্ৰদেশ আদি ৰাজ্যৰ উদাহৰণ দি এই ৰাজ্যসমূহৰ বাতৰি সংবাদ মাধ্যমে পৰিৱেশন নকৰে বুলি অভিযোগ কৰে।

তেওঁ কয়, “এনে ঘটনাৰ ক্ষেত্ৰত মধ্য প্ৰদেশ শীৰ্ষত। এনে ঘটনা ক’ত হোৱা নাই; হাৰিয়ানা, উত্তৰ প্ৰদেশতো এনে ঘটনা ঘটিছে। এনে ঘটনা যেতিয়া আন ঠাইত ঘটে, আপোনালোকে কিয় প্ৰকাশ নকৰে।” “কোনো লোকে বিষাক্ত সুৰা পান কৰাৰ সময়ত আমি এনে সুৰা খালে মৃত্যুমুখত পৰিব বুলি সকীয়াই দিছো।”— কুমাৰে লগতে কয়।

উল্লেখ্য যে মুখ্যমন্ত্ৰী নীতিশ কুমাৰে কালিও সুৰা পানৰ ফলত নিহত হোৱা লোকসকলৰ পৰিয়ালক ক্ষতিপূৰণ দিবলৈ অস্বীকাৰ কৰিছিল। লগতে তেওঁ ৰাজ্যত সুৰাৰ ওপৰত নিষেধাজ্ঞা আৰোপ কৰা আছে যেতিয়া ৰাজ্যৰ বাসিন্দাসকল অধিক সজাগ হ’ব লাগে বুলি মন্তব্য কৰিছিল।