আৰ্জেন্টিনাৰ হৈ বাজী লগাইছিল ১০ কোটি টকা : আৰ্জেন্টিনা জিকিল। কিন্তু নিজিকিল জুৱাৰী

১৮ ডিচেম্বৰ নিশা কাটাৰৰ লুছাইল ষ্টেডিয়ামত ইতিহাস ৰচনা কৰে ফুটবলৰ মহানায়ক লিয়নেল মেছিয়ে। পেনাল্টি শ্বুটআউটত ফ্ৰান্সক পৰাস্ত কৰি ৩৬ বছৰৰ পাছত আৰ্জেণ্টিনাই আঁজুৰি আনে বিশ্বকাপৰ ট্ৰফী।

এই খেলখনত ১০ কোটি টকাৰ বাজি লগাইছিল আন্তৰ্জাতিক পৰ্যায়ৰ গায়ক ড্ৰেকে। চূড়ান্ত খেলখনত আৰ্জেন্টিনাৰ হৈ ১০ লাখ মাৰ্কিন ডলাৰ (যাৰ ভাৰতীয় মূল্য ১০ কোটি ৬০ লাখ) বাজি লগাইছিল কানাডিয়ান ৰেপাৰজনে। বিশ্বকাপত আৰ্জেন্টিনা জিকিল। কিন্তু জুৱা নিজিকিল ড্ৰেকে।

কিন্তু কিয় ?

যিহেতু ৯০ মিনিটৰ খেলখনত আৰ্জেণ্টিনাই ফ্ৰান্সৰ বিৰুদ্ধে বিজয় সাব্যস্ত কৰিব নোৱাৰিলে। সেয়েহে ৰেপাৰ ড্ৰেক সন্মুখীন হ’বলগীয়া হ’ল এক বৃহৎ ক্ষতিৰ।

বিভিন্ন আন্তঃৰাষ্ট্ৰীয় সংবাদ মাধ্যমৰ সূত্ৰৰ মতে, ড্ৰেকে জুৱা খেলা বজাৰখনত অতিৰিক্ত সময়ৰ ফলাফলৰ কথা বিবেচনা কৰা নহয়। ৯০ মিনিটত মেচখন জয়ী হ’লেহে স্ক’ৰ বৈধ বুলি গণ্য কৰা হয়। দেওবাৰে ৯০ মিনিটৰ অন্তত ২-২ গ’লত স্ক’ৰ হয়। প্ৰথম ৭৯ মিনিটত আৰ্জেণ্টিনাই ২-০ গ’লত অগ্ৰগতি লাভ কৰিছিল যদিও শেষ মুহূৰ্তত ফ্ৰান্সে এমবাপেৰ দুটা গ’লেৰে সমতা স্থাপন কৰে। অতিৰিক্ত সময়ৰ দ্বিতীয়াৰ্ধতো মেছিবাহিনীয়ে বিজয় সাব্যস্ত কৰিব নোৱাৰিলে। শেষত লিয়নেল মেছিৰ নীলা বগা দলটোৱে পেনাল্টি শ্বুটআউটত ফ্ৰান্সক ৪-২ গ’লৰ ব্যৱধানত ফ্ৰান্সক পৰাস্ত কৰি বিশ্বকাপ জয় কৰে।

যদি আৰ্জেণ্টিনাই নব্বৈ মিনিটৰ ভিতৰতে খেলখনত জয়ী হ’বলৈ সক্ষম হ’লহেঁতেন তেন্তে ড্ৰেকে জুৱা খেলি ১৭৫ লাখ মাৰ্কিন ডলাৰ লাভ কৰিলেহেঁতেন৷

উল্লেখ্য যে, ড্ৰেকে ইয়াৰ পূৰ্বেও বৃহৎ পৰিমাণৰ ধন বাজি লগাই লোকচানৰ সমুখীন হৈছে। যোৱা মাহত ইউ এফ চিৰ খেলত ইজৰাইলৰ আডেছানিয়াৰ ওপৰত বাজি লগাই প্ৰায় ২ কোটি ২০ লাখ মাৰ্কিন ডলাৰ হেৰুৱাইছিল গায়ক গৰাকীয়ে।

মন কৰিবলগীয়া যে কানাডাৰ চিটকম ‘ডেগ্ৰাছি’ত হাইস্কুলীয়া ছাত্ৰৰ চৰিত্ৰত অভিনয় কৰি ছবি জগতত আত্মপ্ৰকাশ কৰিছিল ড্ৰেকে। বৰ্তমান ড্ৰেকৰ নেট ৱৰ্থ হৈছে ২৫ কোটি ডলাৰ।