ডিব্ৰুগড়ত চাঞ্চল্য: চাহ বাগিচাত উদ্ধাৰ বৃহৎ পৰিমাণৰ অস্ত্ৰৰ ভাণ্ডাৰ

ডিব্ৰুগড় জিলাৰ এখন চাহ বাগিচাৰ পৰা সোমবাৰে অসম আৰক্ষী আৰু চি আৰ পি এফৰ এটা দলে উদ্ধাৰ কৰিছে বৃহৎ পৰিমাণৰ অস্ত্ৰ-শস্ত্ৰ আৰু গোলা-বাৰুদৰ এক ভাণ্ডাৰ।

ডিব্ৰুগড়ৰ দক্ষিণ জালান চাহ বাগিচাৰ পৰা আৰক্ষীৰ দলটোৱে উদ্ধাৰ কৰিছে এই অস্ত্ৰ-শস্ত্ৰ তথা গোলাবাৰুদ সমূহ।

জিলাখনৰ আৰক্ষী অধীক্ষক শ্বেতাংক মিশ্ৰই এই সন্দৰ্ভত জানিবলৈ দিয়া মতে আৰক্ষীয়ে এক সূত্ৰৰ জৰিয়তে চাহ বাগিচাখনত অস্ত্ৰ-শস্ত্ৰ, গোলা-বাৰুদ, বিস্ফোৰক সামগ্ৰী লুকুৱাই থোৱাৰ তথ্য লাভ কৰিছিল।

“ইয়াৰ পিছতে আমি কেন্দ্ৰীয় সংৰক্ষিত আৰক্ষী বাহিনী (চি আৰ পি এফ)ৰ সৈতে যৌথভাৱে অস্ত্ৰ-শস্ত্ৰ আৰু গোলা-বাৰুদ উদ্ধাৰৰ বাবে অভিযান আৰম্ভ কৰিছিলো।”- তেওঁ লগতে কয়।

আৰক্ষী অধীক্ষক গৰাকীয়ে সদৰী কৰা মতে, এই অভিযানত দুটা এ কে ৪৭ মেগজিন, ১২ জাঁই গুলী, কেইটামান গ্ৰেনেড, আৰু কিছুমান টাইমাৰ ডিভাইচ উদ্ধাৰ কৰা হৈছে।

এই অস্ত্ৰ-গোলাবাৰুদ সমূহ কোনে, কি কাৰণত চাহ বাগিচাখনত লুকুৱাই ৰাখিছিল সেয়া এতিয়াও জানিব পৰা হোৱা নাই। এই সন্দৰ্ভত অধিক তথ্য উন্মোচনৰ বাবে আৰক্ষীৰ অভিযান অব্যাহত আছে।

এই মাৰণাস্ত্ৰ সমূহ উদ্ধাৰৰ পাছতে ডিব্ৰুগড় জিলা আৰক্ষীক হাই এলাৰ্টত ৰখা হৈছে বুলি আৰক্ষী অধীক্ষক শ্বেতাংক মিশ্ৰই লগতে কয়।