কাশ্মীৰত তিনি সেনা জোৱানৰ শোকাৱহ মৃত্যু: সীমান্তত পহৰাৰ সময়তে বাগৰি পৰিল দ খাৱৈত
জম্মু-কাশ্মীৰৰ কুপৱাৰা জিলাত কালি সন্ধিয়া শোকাৱহভাৱে প্ৰাণ হেৰুৱাইছে তিনি সেনা জোৱানে। সীমান্তৰ নিয়ন্ত্ৰণ ৰেখাত টহল দি থকা অৱস্থাত দ খাৱৈত পিছলি পৰাৰ ফলত এগৰাকী জুনিয়ৰ কমিচনড অফিচাৰ (JCO)কে ধৰি তিনিগৰাকী জোৱানৰ মৃত্যু হয়।
সেনাবাহিনীৰ এগৰাকী বিষয়াই জানিবলৈ দিয়া মতে, মঙলবাৰে জুনিয়ৰ কমিচনড অফিচাৰ আৰু আন দুগৰাকী ৰেংক জোৱানে মেচিল ছেক্টৰত দৈনিক কৰ্তব্য অনুসৰি টহল দি থকাৰ সময়তে তিনিওগৰাকী খাৱৈত পিছলি পৰে।
সেনাৰ এগৰাকী মুখপাত্ৰই ঘটনা সন্দৰ্ভত সবিশেষ বিৱৰণ দি কয় যে মঙলবাৰে সন্ধিয়া প্ৰায় ৫.৩০ বজাত পহৰাদাৰী দলটো ফৰৱাৰ্ড পোষ্টৰ ফালে আগবাঢ়ি যোৱাৰ সময়ত বৰফ ভাঙি খহি পৰাৰ ফলত জুনিয়ৰ কমিচনড অফিচাৰগৰাকী আৰু দুগৰাকী জোৱান খাৱৈত বাগৰি পৰে।
সেনাৰ দলে তাৎক্ষণিকভাৱে অনুসন্ধান আৰু উদ্ধাৰ অভিযান আৰম্ভ কৰে। বতৰৰ প্ৰতিকূল পৰিস্থিতি আৰু ঘটনাস্থলীৰ প্ৰতিকূলতাৰ মাজতো অনুসন্ধান দলৰ নিৰন্তৰ প্ৰচেষ্টাৰ ফলত আজি পুৱা ০৪:১৫ বজাৰ পৰা ০৪:৪৫ বজাৰ ভিতৰত তিনিওগৰাকী জোৱানৰ মৃতদেহ উদ্ধাৰ কৰা হয়।
নিহত জোৱান কেইগৰাকীক নাইব সুবেদাৰ পৰষোত্তম কুমাৰ, হাবিলদাৰ অমৃক সিং আৰু চিপাহী অমিত শৰ্মা বুলি চিনাক্ত কৰা হৈছে। জম্মু-কাশ্মীৰৰ বিষনাহ অঞ্চলৰ বাসিন্দা পৰষোত্তম কুমাৰে ১৯৯৬ চনত সেনাবাহিনীত যোগদান কৰিছিল।
আনহাতে ২০০১ চনত সেনাবাহিনীত যোগদান কৰা অমৃক সিং হিমাচল প্ৰদেশৰ উনা জিলাৰ বাসিন্দা। হিমাচল প্ৰদেশৰ হামিৰপুৰ জিলাৰ বাসিন্দা অমিত শৰ্মাই ২০১৯ চনত সেনাবাহিনীত যোগদান কৰিছিল।
সেনাৰ মুখপাত্ৰগৰাকীয়ে কয় যে তিনিওগৰাকী জোৱানৰ মৃতদেহ নিজ নিজ জন্মস্থানলৈ লৈ যোৱা হ’ব আৰু জন্মস্থানতে তেওঁলোকক সম্পূৰ্ণ সামৰিক সন্মানেৰে শেষকৃত্য প্ৰদান কৰা হ’ব।
You may also like
গুৱাহাটীৰ ব্যৱসায়ী শৈলেন দত্ত কোঁৱৰৰ পৰলোকপ্ৰাপ্তি
গুৱাহাটীস্থিত বিশিষ্ট ব্যৱসায়ী তথা অসমীয়া দৈনিক কাকত অসমীয়া খবৰৰ পৰিচালন সঞ্চালক শৈলেন দত্ত কোঁৱৰে দীৰ্ঘদিনীয়া অসুস্থতাৰ সৈতে যুঁজি শনিবাৰে সন্ধিয়া নতুন দিল্লীৰ…
‘তৃতীয় কাৰ্যকাল সমাপ্ত হোৱাৰ পূৰ্বেই ভংগ হ’ব পাৰে মোদী চৰকাৰ’; ৰাহুল গান্ধীৰ পূৰ্বানুমানত অস্বস্তিত বিজেপি
ৰাহুল গান্ধীৰ এক সাক্ষাৎকাৰে জোকাৰণি তুলিছে দেশৰ ৰাজনীতিত। লগতে কঁপনি তুলিছে শাসকীয় বিজেপিৰ অন্তৰ্ভাগত। উল্লেখ্য যে নিৰ্বাচনৰ ফলাফল ঘোষণাৰ পাছতে ৰাহুল গান্ধীয়ে…
“এইবাৰ সপোন পূৰণ হ’ব ৰাজীৱ গান্ধীৰ” – কিয় এনেকৈ ক’লে ছোনীয়া গান্ধীয়ে?
মহিলা সংৰক্ষণ বিধেয়কক সমৰ্থন জনাইছে কংগ্ৰেছে। অৱশ্যে কংগ্ৰেছ নেত্ৰী ছোনিয়া গান্ধীয়েও এই বিধেয়কখনৰ ওপৰত কেইবাটাও চৰ্ত আৰোপ কৰিছে। বুধবাৰে সংসদৰ বিশেষ অধিৱেশনৰ…
ৰক্তাক্ত জম্মু-কাশ্মীৰ: সন্ত্ৰাসবাদীৰে সংঘৰ্ষত নিহত তিনি সেনা-আৰক্ষী বিষয়া
পুনৰ ৰক্তাক্ত হৈছে জম্মু-কাশ্মীৰ। উপত্যকাটোৰ অনন্তনাগ জিলাত সন্ত্ৰাসবাদীৰ সৈতে হোৱা সংঘৰ্ষত নিহত হৈছে সেনাৰ এজন কৰ্ণেল, সেনাৰ ৰাষ্ট্ৰীয় ৰাইফলছ ইউনিটৰ এজন মেজৰ…