অসুস্থ পৃথিৱীৰ খৱৰ! কঙ্গোত গণ কবৰত উদ্ধাৰ শিশুসহ ৪৯ জন লোকৰ মৃতদেহ

শান্তিৰক্ষীসকলে মধ্য আফ্ৰিকাৰ দেশ ডেম’ক্ৰেটিক ৰিপাব্লিক অৱ কঙ্গোৰ এটা গণ কবৰৰ পৰা শিশুসহ ৪৯ জন লোকৰ মৃতদেহ উদ্ধাৰ কৰিছে। যোৱা সপ্তাহৰ শেষৰ পিনে তাত গাওঁবাসী আৰু উগ্ৰপন্থী গোটৰ মাজত ব্যাপক সংঘৰ্ষ হৈছিল।

কঙ্গোৰ উত্তৰে উগাণ্ডাৰ সৈতে সীমান্তৰ ওচৰত অৱস্থিত ইতুৰি প্ৰদেশ। যোৱা সপ্তাহৰ শেষতে তাৰ পৰা গণ কবৰটো উদ্ধাৰ কৰা হয়।

ৰাষ্ট্ৰসংঘৰ শান্তিৰক্ষী বাহিনীৰ এজন মুখপাত্ৰ ফাৰহান হকে কৈছে যে মৃতদেহবোৰ লগালগি দুখন গাওঁৰ পৰা উদ্ধাৰ কৰা হৈছে। নিয়ামাম্বা গাঁৱৰ পৰা ৪২ টা মৃতদেহ উদ্ধাৰ কৰা হৈছে। তেওঁলোকৰ ভিতৰত ছয়টি শিশু। আনহাতে, চুবুৰীয়া মবগী গাঁৱৰ পৰা বাকী সাতটা মৃতদেহ উদ্ধাৰ কৰা হয়।

উত্তৰ কঙ্গোৰ এই অঞ্চলটো সদায়েই এক উত্তেজনাপূৰ্ণ অঞ্চল হিচাপে পৰিচিত হৈ আহিছে। ইয়াত কেইবাটাও উগ্ৰপন্থী আৰু সন্ত্ৰাসবাদী গোট সক্ৰিয় হৈ আছে। তেনে এটা গোট হৈছে কোডেকো। কোঅপাৰেটিভ ফৰ দ্য ডেভেলপমেন্ট অফ কঙ্গো নামৰ এই গোটটো মুখ্যতঃ লেণ্ডু কৃষকসকলৰ দ্বাৰা গঠিত। তেওঁলোকৰ আটাইতকৈ ডাঙৰ প্ৰতিদ্বন্দী হৈছে হেমা ম’হপালকসকলক।

যোৱা সপ্তাহৰ শেষত, কোডেকোই অভিযান চলাবলৈ উত্তৰ কঙ্গোলৈ গৈছিল। অৱশ্যে, সংঘৰ্ষ আৰম্ভ হোৱাৰ অলপ পিছতে ৰাষ্টসংঘৰ শান্তিৰক্ষী বাহিনী গৈ তাত উপস্থিত হৈছিল। সেইদিনাই কবৰবোৰ নিৰ্মাণ কৰা হৈছিল নে নাই সেয়া জানিব পৰা হোৱা নাই যদিও একেদিনাই কবৰবোৰ শান্তিৰক্ষী বাহিনীৰ দৃষ্টিত পৰিছিল।

অৱশ্যে, শান্তিৰক্ষী বাহিনীৰ এজন মুখপাত্ৰই কয় যে অতীততো অঞ্চলটোত একাধিক সংঘৰ্ষ হৈছিল। কবৰবোৰ সেই সময়ৰো হ’ব পাৰে। কিন্তু শিশুসকলক যিধৰণে আক্ৰমণ কৰা হৈছে সেয়া অত্যন্ত মৰ্মান্তিক।

যোৱা কেইমাহমানত কঙ্গোত সংঘৰ্ষ যথেষ্ট বৃদ্ধি পাইছে। ডেৰ মাহত মুঠ ১৯৫ জন লোক নিহত হৈছে। শান্তিৰক্ষী বাহিনীৰ উপস্থিতিতো কেনেকৈ এই ঘটনা অব্যাহত আছে তাক লৈ বিভিন্ন মহলত প্ৰতিক্ৰিয়া অব্যাহত আছে।